لبنان میں اسرائیلی حملے، ایک ہلاک اور آٹھ زخمی

لبنان ( مانیٹرنگ ڈیسک)لبنان کے جنوبی علاقوں میں اسرائیلی فضائی حملوں کے نتیجے میں ایک شخص جاں بحق اور آٹھ افراد زخمی ہو گئے ہیں۔خبر رساں ایجنسیوں کے مطابق اسرائیلی فوج نے پیر کے روز جنوبی لبنان کے مختلف علاقوں میں کارروائیاں کیں، جن میں دو دیہات کے رہائشی علاقے نشانہ بنائے گئے۔ لبنان کی سرکاری خبر رساں ایجنسی کے مطابق حملے جنوبی قصبوں کفر تبنیت اور عین قانا میں کیے گئے، جہاں عمارتوں کو بھی نقصان پہنچا اور عین قانا میں دھویں کے بادل اٹھنے کے مناظر دیکھے گئے۔اس سے قبل اسرائیلی فوج نے ان علاقوں کے لیے انخلا کی وارننگ جاری کی تھی اور دعویٰ کیا کہ کارروائی کا مقصد اسلحہ ذخیرہ کرنے کی تنصیبات کو نشانہ بنانا تھا۔ تاہم لبنان کے حکام کا کہنا ہے کہ بمباری زیادہ تر رہائشی علاقوں میں کی گئی۔لبنان کی وزارت صحت کے مطابق جنوبی علاقے انصاریہ میں ایک حملے میں ایک شخص ہلاک اور چار افراد زخمی ہوئے، جبکہ قلیلہ میں ایک اور حملے میں مزید چار افراد زخمی ہوئے۔ بعض گاڑیوں کو بھی نشانہ بنایا گیا، اور کارروائیاں بغیر کسی پیشگی وارننگ کے کی گئیں۔واضح رہے کہ نومبر 2024 میں ہونے والے جنگ بندی معاہدے کے باوجود اسرائیل لبنان میں حملے جاری رکھے ہوئے ہے۔ جنگ بندی کے بعد اب تک 360 سے زائد افراد اسرائیلی کارروائیوں میں جاں بحق ہو چکے ہیں، اور لبنان نے ان حملوں کو معاہدے کی خلاف ورزی قرار دیتے ہوئے متعدد بار احتجاج کیا ہے۔