پاکستان غزہ کے آئی ایس ایف میں فوجی شمولیت کے حوالے سے خاموش

اسلام آباد( پاکستان خبر) غزہ کے لیے مجوزہ بین الاقوامی استحکام فورس (آئی ایس ایف) میں پاکستانی دستوں کی شمولیت کے حوالے سے پاکستان نے تاحال اپنا موقف ظاہر نہیں کیا۔ادھر امریکی صدر ڈونلڈ ٹرمپ نے اعلان کیا ہے کہ ان کے نو تشکیل شدہ بورڈ آف پیس کے رکن ممالک نے اپنی پہلی سربراہی ملاقات سے قبل ہی ہزاروں اہلکار فراہم کرنے کا عزم ظاہر کر دیا ہے۔ بورڈ کا پہلا باقاعدہ اجلاس منگل 19 فروری کو واشنگٹن میں ہوگا، جہاں غزہ کی تعمیرِ نو کے منصوبے اور اقوامِ متحدہ سے منظور شدہ استحکام فورس کے ڈھانچے کی وضاحت متوقع ہے۔وزیرِ اعظم شہباز شریف بھی سربراہی اجلاس میں شرکت کریں گے۔ تاہم اسلام آباد میں حکام نے پاکستان کی فورس کی شرکت کے حوالے سے کسی موقف کی تصدیق یا تردید نہیں کی، اور بتایا کہ یہ معاملہ فی الوقت زیرِ بحث اور حساس نوعیت کا ہے۔