عماد بت کی قیادت میں قومی ہاکی ٹیم مصر پہنچ گئی، ہاکی ورلڈکپ کوالیفائر کا آغاز

اسلام آباد( سپورٹس ڈیسک)قومی ہاکی ٹیم پاکستان ہاکی ٹیم عماد بت کی قیادت میں ہاکی ورلڈکپ کوالیفائر میں شرکت کے لیے مصر پہنچ گئی۔ ٹیم براستہ ریاض اور قاہرہ کوالیفائر کے میزبان شہر پہنچی، جہاں قاہرہ ایئرپورٹ پر پاکستانی سفیر ڈاکٹر طلحہ نے کھلاڑیوں کا پرتپاک استقبال کیا اور گلدستہ پیش کیا۔پاکستانی ٹیم گروپ بی میں ملائیشیا، چین اور آسٹریا کے ساتھ شامل ہے۔ پہلا میچ یکم مارچ کو چین کے خلاف، دوسرا میچ 2 مارچ کو ملائیشیا کے خلاف اور تیسرا میچ 4 مارچ کو آسٹریا کے خلاف ہوگا۔ گروپ اے میں انگلینڈ، جاپان، مصر اور امریکا شامل ہیں، اور ہر گروپ کی دو ٹاپ ٹیمیں سیمی فائنل میں پہنچیں گی۔ہیڈ کوچ خواجہ جنید کے مطابق تمام کھلاڑی بہترین پرفارمنس دینے کے لیے تیار ہیں۔ انہوں نے کہا کہ جدید ہاکی میں کوئی بھی ٹیم آسان نہیں، ہر میچ بہت اہم ہے، اور پہلا ہدف سیمی فائنل میں رسائی پانا ہے، جس کے بعد ٹیم ٹائٹل جیتنے کے لیے بھرپور کوشش کرے گی۔