خلیج میں جنگ کے اثرات، پاکستان میں روئی اور پھٹی کی قیمتوں میں ریکارڈ اضافہ

اسلام آباد( کامر س ڈیسک)خلیج میں جاری جنگ کے باعث درآمدی سرگرمیوں کی معطلی کے بعد پاکستان میں روئی اور پھٹی کی قیمتوں میں غیرمعمولی اضافے کا رجحان دیکھنے میں آیا ہے۔گزشتہ ہفتے مقامی کاٹن مارکیٹس میں فی من روئی کی قیمت ایک ہزار 500 روپے کے اضافے کے ساتھ کاٹن ایئر 2025-26 کی نئی بلند ترین سطح 19 ہزار 500 روپے تک پہنچ گئی، جبکہ فی 40 کلوگرام پھٹی کی قیمت ایک ہزار روپے کے اضافے کے ساتھ 9 ہزار 300 روپے کی سطح تک پہنچ گئی۔ ماہرین کے مطابق رواں ہفتے بھی قیمتوں میں مزید اضافے کے امکانات ہیں۔کاٹن سیکٹر کے اسٹیک ہولڈرز کا کہنا ہے کہ بڑھتی ہوئی طلب کے پیش نظر کاٹن ایئر 2026-27 کے دوران کپاس کی کاشت میں بھی اضافہ متوقع ہے۔چیئرمین کاٹن جنرز فورم احسان الحق نے نجی ٹی وی سے گفتگو میں بتایا کہ خلیجی جنگ کے باعث روئی کی درآمدات معطل ہونے، بین الاقوامی مارکیٹس میں قیمتوں میں ریکارڈ اضافہ، ملک بھر کے کاٹن زونز میں غیر متوقع درجہ حرارت کی کمی اور ہلکی بارشوں کی وجہ سے کپاس کی کاشت متاثر ہوئی، جس کے نتیجے میں گذشتہ دو ہفتوں سے مقامی مارکیٹ میں روئی اور پھٹی کی قیمتوں میں تیزی دیکھی جا رہی ہے۔