ایران کی درخواست مسترد، ورلڈ کپ میچز امریکا میں ہی ہوں گے

واشنگٹن ( سپورٹس ڈیسک) عالمی فٹبال تنظیم فیفا نے ایران کی جانب سے 2026 ورلڈ کپ کے میچز امریکا سے کسی اور ملک منتقل کرنے کی درخواست مسترد کر دی ہے جس کے بعد ایران کی شرکت پر سوالات اٹھنے لگے ہیں۔غیر ملکی خبر رساں ادارے کے مطابق میکسیکو کی صدر کلاؤڈیا شین بام نے تصدیق کی کہ فیفا نے انتظامی رکاوٹوں کو بنیاد بناتے ہوئے ایران کی درخواست قبول نہیں کی۔رپورٹس کے مطابق ایران نے امریکا اور اسرائیل کے درمیان کشیدگی اور سیکیورٹی خدشات کے پیش نظر مطالبہ کیا تھا کہ اس کے گروپ میچز امریکا کے بجائے میکسیکو میں منتقل کیے جائیں۔تاہم فیفا نے واضح کیا ہے کہ ٹورنامنٹ کے شیڈول میں کوئی تبدیلی نہیں کی جائے گی اور تمام میچز پہلے سے طے شدہ مقامات پر ہی منعقد ہوں گے۔میکسیکن صدر نے بھی فیفا کے مؤقف کی تائید کرتے ہوئے کہا کہ میچز منصوبہ بندی کے مطابق امریکا میں ہی کھیلے جائیں گے۔