چینی سیٹلائٹ کے ذریعے امریکی اڈوں کی نگرانی، خفیہ دستاویزات نے تہلکہ مچا دیا

 تہر ان( مانیٹرنگ ڈیسک)خفیہ دستاویزات میں انکشاف ہوا ہے کہ ایران نے چینی جاسوس سیٹلائٹ کے ذریعے امریکی فوجی اڈوں کی نگرانی کی اور اہم معلومات حاصل کیں۔برطانوی اخبار فنانشل ٹائمز کی رپورٹ کے مطابق 2024 کے اواخر میں چین کا تیار کردہ سیٹلائٹ ٹی ای ای-01 بی ایران کے حوالے کیا گیا، جسے پاسدارانِ انقلاب کی ایرو اسپیس فورس نے حاصل کیا۔رپورٹ میں بتایا گیا ہے کہ اس سیٹلائٹ کو امریکی فوجی تنصیبات کی نگرانی کے لیے استعمال کیا گیا اور اس کے ذریعے حاصل کی جانے والی تصاویر کو حساس اہداف کی نشاندہی میں استعمال کیا گیا۔مزید کہا گیا ہے کہ یہ تصاویر مارچ میں مختلف مقامات پر ڈرون اور میزائل حملوں سے قبل اور بعد میں لی گئیں، جس سے کارروائیوں کی منصوبہ بندی میں مدد ملی۔سیٹلائٹ نے پرنس سلطان ایئر بیس کی 13، 14 اور 15 مارچ کو تصاویر حاصل کیں، جبکہ 14 مارچ کو ڈونلڈ ٹرمپ نے تصدیق کی تھی کہ اس اڈے پر امریکی طیاروں کو نشانہ بنایا گیا۔رپورٹ کے مطابق اس انکشاف نے خطے میں سکیورٹی خدشات کو مزید بڑھا دیا ہے اور عالمی سطح پر نئی بحث چھیڑ دی ہے۔