عید نہ منانے کے بیان پر اداکارہ ریشم تنقید اور حمایت کی زد میں

لاہور( شوبز ڈیسک)پاکستان شوبز انڈسٹری کی معروف اداکارہ ریشم ایک بار پھر خبروں کی زینت بن گئی ہیں، اس بار ان کا عید سے متعلق دیا گیا منفرد بیان سوشل میڈیا پر نئی بحث کا باعث بن گیا ہے۔ریشم نے اپنے فنی سفر کا آغاز سرکاری ٹیلی وژن سے کیا اور بعد ازاں فلمی دنیا میں بھی اپنی اداکاری کے جوہر دکھائے، وہ ہمیشہ اپنی اداکاری، انداز اور فیشن کی وجہ سے مداحوں میں مقبول رہی ہیں، بعد میں فلمی معیار میں کمی کے باعث انہوں نے دوبارہ ٹیلی وژن کا رخ کیا اور وہاں بھی کامیابی حاصل کی۔حالیہ بیان میں اداکارہ ریشم نے کہا کہ وہ ایسے وقت میں عید نہیں مناتیں جب ان کے اردگرد دنیا خوشیاں نہ منا رہی ہو، ان کے مطابق عالمی حالات، جنگیں، تباہی اور عوام کو درپیش مشکلات ان کی ذاتی خوشیوں کو بھی متاثر کرتی ہیں، اسی لیے وہ عید کی روایتی خوشیوں میں مکمل طور پر شریک نہیں ہوتیں۔اداکارہ کے اس بیان نے سوشل میڈیا پر ہلچل مچا دی ہے، جہاں کچھ صارفین نے ان کے مؤقف کی حمایت کرتے ہوئے کہا کہ موجودہ حالات میں خوشیاں منانا واقعی مشکل ہو جاتا ہے، وہیں بعض افراد نے اختلاف کرتے ہوئے مؤقف اختیار کیا کہ عید ایک مذہبی تہوار ہے جسے ہر حال میں منانا چاہیے۔سوشل میڈیا صارفین کی جانب سے مختلف آرا سامنے آ رہی ہیں، کچھ نے اسے دل کی آواز قرار دیا جبکہ دیگر نے اسے متنازع بیان کہا، جس کے باعث اس موضوع پر بحث تاحال جاری ہے۔