کراچی: سندھ ہائیکورٹ نے کراچی ایئرپورٹ سے لاپتا ہونے والے شہری کی گمشدگی کے کیس پر اہم حکم جاری کرتے ہوئے تھانہ ایئرپورٹ کے ایس ایچ او کو فوری طور پر مقدمہ درج کرنے کی ہدایت دے دی۔
درخواست گزار کی جانب سے سندھ ہائیکورٹ میں دائر کی گئی درخواست میں مؤقف اختیار کیا گیا تھا کہ کاشف علی نامی شخص اپنی اہلیہ کے ہمراہ 27 مارچ کو بیرون ملک روانگی کے لیے جناح انٹرنیشنل ایئرپورٹ پہنچا تھا، جہاں سکیورٹی اداروں نے دونوں میاں بیوی کو طیارے سے آف لوڈ کیا۔ درخواست کے مطابق کچھ دیر بعد کاشف علی کی اہلیہ کو رہا کر دیا گیا، تاہم کاشف علی کو نامعلوم مقام پر منتقل کر دیا گیا جس کے بعد سے اس کا کچھ پتہ نہیں چل سکا۔
درخواست گزار کے وکیل نے عدالت کے روبرو مؤقف اختیار کیا کہ اہل خانہ کی جانب سے قانون نافذ کرنے والے اداروں کو بارہا خطوط لکھے گئے، لیکن اب تک کاشف علی کی بازیابی ممکن نہیں ہو سکی۔ اس کے علاوہ پولیس کی جانب سے بھی گمشدگی کی ایف آئی آر درج کرنے سے مسلسل انکار کیا جا رہا ہے۔
عدالت نے کیس کی سماعت کے دوران ریمارکس دیے کہ مسنگ پرسنز سے متعلق کیسز کی سماعت کا اختیار آئینی بینچ کے پاس ہوتا ہے، لہٰذا یہ معاملہ آئینی بینچ کو بھیج دیا جائے گا۔ عدالت نے فوری طور پر تھانہ ایئرپورٹ کے ایس ایچ او کو گمشدگی کا مقدمہ درج کرنے کا حکم دیا اور کیس کو آئینی بینچ کے سپرد کر دیا۔
عدالتی فیصلے سے متاثرہ خاندان کو کسی حد تک قانونی ریلیف ملا ہے، جبکہ یہ معاملہ اب مزید آئینی کارروائی کے لیے آئینی بینچ کے سامنے پیش کیا جائے گا۔ کاشف علی کی گمشدگی کا معاملہ شہری حلقوں میں بھی تشویش کا باعث بن گیا ہے، اور خاندان کو اب عدالت سے انصاف کی امید ہے۔
