سیئول: جنوبی کوریا میں صدر یون سک یول کی معزولی کے بعد، 3 جون 2025 کو قبل از وقت صدارتی انتخابات کا انعقاد کیا جائے گا۔ یہ اعلان قائم مقام صدر ہان ڈک سو نے باضابطہ طور پر کیا۔
یاد رہے کہ صدر یون نے گزشتہ دسمبر میں مختصر مدت کے لیے مارشل لا نافذ کیا تھا اور قومی اسمبلی میں فوج تعینات کی تھی، جس پر عوام میں شدید غصہ اور تنقید سامنے آئی تھی۔ اس کے نتیجے میں آئینی عدالت نے صدر یون کو متفقہ طور پر معزول کر دیا تھا۔ چند گھنٹوں بعد ہی صدر یون نے مارشل لا واپس لے لیا، مگر ان کا یہ اقدام ماضی کے آمرانہ دور کی یاد دلاتا ہے، جس نے ملک میں سیاسی بحران کو مزید گہرا کر دیا۔
جنوبی کوریا کے آئین کے مطابق، اگر صدر کا عہدہ خالی ہو جائے تو 60 دن کے اندر انتخابات کرانے کی ضرورت ہوتی ہے۔ اسی لیے 3 جون 2025 کو ہونے والے انتخابات کا اعلان کیا گیا ہے تاکہ آئینی تقاضے پورے کیے جا سکیں۔
اس وقت جنوبی کوریا کی ڈیموکریٹک پارٹی کے رہنما، لی جے میونگ، صدارتی انتخاب کے سب سے مضبوط امیدوار سمجھے جا رہے ہیں، حالانکہ ان پر بعض قانونی مقدمات زیرِ تفتیش ہیں۔ حالیہ گیلپ کوریا پول کے مطابق، لی کو 34 فیصد عوامی حمایت حاصل ہے، جو دیگر قدامت پسند امیدواروں سے کہیں زیادہ ہے۔
دوسری جانب، سابق وزیرِ محنت کم مون سو اور رکن پارلیمان اہن چول سو بھی صدارتی انتخاب میں حصہ لے رہے ہیں۔ اہن چول سو نے صدر یون کے خلاف مواخذے کی حمایت کی تھی اور انہوں نے وعدہ کیا ہے کہ وہ مصنوعی ذہانت کی مدد سے معیشت کو ترقی دیں گے تاکہ امریکی صدر ٹرمپ کی تجارتی پالیسیوں کے اثرات سے نمٹا جا سکے۔
واضح رہے کہ سابق صدر یون کے خلاف بغاوت کا مقدمہ 14 اپریل سے شروع ہو گا، جس کا ملک بھر میں دھیان مرکوز ہے۔
