امریکی فوج ایران کے خلاف ممکنہ طویل جنگ کی تیاری کر رہی ہے: امریکی اخبار

واشنگٹن ( مانیٹرنگ ڈیسک) امریکی فوج صدر ڈونلڈ ٹرمپ کے حکم پر ایران کے خلاف ممکنہ طویل جنگ کی تیاری کر رہی ہے، جو دونوں ممالک کے درمیان ماضی کے مقابلے میں بدترین کشیدگی پیدا کر سکتی ہے۔رائٹرز کی رپورٹ میں عہدیداروں نے بتایا کہ حساس منصوبے کی نوعیت کے سبب ان کی شناخت ظاہر نہیں کی جا رہی، تاہم امریکی فوج کو حکم ملنے کی صورت میں ایران پر فوری کارروائی کے لیے تیار رہنے کی ہدایت دی گئی ہے۔ عہدیداروں کے مطابق اس منصوبہ بندی میں ایرانی جوہری تنصیبات کے علاوہ ریاستی اور سلامتی کے اہم ادارے بھی ہدف ہو سکتے ہیں، لیکن مزید تفصیلات فراہم نہیں کی گئیں۔رپورٹ میں یہ بھی بتایا گیا کہ امریکا کو ایران کی جانب سے جوابی حملے کا خدشہ ہے، جس کے نتیجے میں دونوں ممالک کے درمیان انتقامی کارروائیوں کا سلسلہ شروع ہو سکتا ہے۔ وائٹ ہاؤس کی ترجمان اینا کیلی نے کہا کہ صدر ٹرمپ نے ایران کے حوالے سے تمام آپشنز کھلے رکھے ہیں۔