ٹی20 ورلڈ کپ 2026: ناقص کارکردگی پر پاکستانی کھلاڑیوں پر 50 لاکھ روپے جرمانہ

لاہور( سپورٹس ڈیسک) ٹی20 ورلڈ کپ 2026 میں ناقص کارکردگی کے باعث پاکستان کرکٹ بورڈ (پی سی بی) نے قومی کھلاڑیوں پر 50، 50 لاکھ روپے کا جرمانہ عائد کر دیا ہے۔پاکستان ٹیم نے ابتدائی میچ میں نیدرلینڈز کے خلاف مشکل مقابلے کے بعد جیت کے امکانات قائم رکھے، لیکن بھارت اور سری لنکا کے خلاف توقعات کے مطابق کارکردگی نہیں دکھا سکی۔ نمیبیا کو زیر کرکے ٹیم سپر 8 میں پہنچی، تاہم نیوزی لینڈ کے خلاف میچ بارش کی نذر ہوگیا اور انگلینڈ سے شکست کے بعد سیمی فائنل میں رسائی مشکل ہوگئی۔ذرائع کے مطابق بورڈ حکام نے کھلاڑیوں کو واضح کر دیا ہے کہ اب لاڈ پیار کی کوئی گنجائش نہیں، اچھے کھیل پر انعام ملے گا اور ناقص کارکردگی پر جرمانہ لازم ہے۔ بھارت کے خلاف میچ ہارنے کے بعد کھلاڑیوں کو اس فیصلے سے آگاہ کیا گیا تھا۔قومی کرکٹرز کی سالانہ آمدنی کروڑوں میں ہے، اے کیٹیگری پلیئر کو ماہانہ 45 لاکھ روپے معاوضہ اور آئی سی سی کی آمدنی کا 20 لاکھ 70 ہزار روپے حصہ دیا جاتا ہے، جبکہ بی کیٹیگری پلیئرز کو 30 لاکھ ماہانہ معاوضہ اور 15 لاکھ 52 ہزار 500 روپے آئی سی سی شیئر کے طور پر ملتے ہیں۔