سندھ و بلوچستان میں زلزلے کے شدید جھٹکے، شہری گھروں سے باہر نکل آئے

کوئٹہ(پاکستان خبر) سندھ اور بلوچستان کے مختلف علاقوں میں آج زلزلے کے جھٹکے محسوس کیے گئے، جس سے شہریوں میں خوف و ہراس پھیل گیا۔زلزلہ پیما مرکز کے مطابق زلزلے کی شدت 5 اعشاریہ 6 ریکارڈ کی گئی اور زلزلے کی گہرائی 13 کلو میٹر تھی۔ مرکز زلزلے کا مقام خضدار، بلوچستان سے 86 کلو میٹر شمال مشرق میں واقع تھا۔ خضدار میں ایک گھنٹے کے دوران دوسری بار جھٹکے محسوس کیے گئے۔سندھ کے علاقوں قمبر، شہدادکوٹ، دادو، جھل مگسی، جعفرآباد اور نصیر آباد میں بھی زلزلے کے اثرات محسوس کیے گئے۔ جھٹکوں کے دوران لوگ گھروں سے باہر نکل آئے اور کلمہ طیبہ کا ورد کرتے رہے۔ خوش قسمتی سے کسی جانی یا مالی نقصان کی اطلاع موصول نہیں ہوئی۔