ایران یا لبنان پر حملہ ہوا تو ترکیہ بھی میدان میں آئے گا، اردوان کی دھمکی

انقرہ ( مانیٹرنگ ڈیسک) ترک صدر طیب اردوان نے خبردار کیا ہے کہ لبنان یا ایران پر کسی بھی حملے کو ترکیہ پر حملہ تصور کیا جائے گا، جس سے خطے کی کشیدہ صورتحال مزید سنگین ہونے کا خدشہ پیدا ہو گیا ہے۔عرب میڈیا رپورٹس کے مطابق طیب اردوان نے مشرق وسطیٰ کی صورتحال پر اظہار خیال کرتے ہوئے کہا کہ خطے میں بڑھتی ہوئی جنگی فضا انتہائی تشویشناک ہے اور اس کے نتائج خطرناک ہو سکتے ہیں۔انہوں نے اسرائیل کو مخاطب کرتے ہوئے کہا کہ وہ اشتعال انگیزی سے باز رہے اور امن عمل میں رکاوٹیں پیدا نہ کرے، بصورت دیگر سخت ردعمل دیا جائے گا۔ترک صدر کا کہنا تھا کہ علاقائی امن کو نقصان پہنچانے کی قیمت اسرائیل کو چکانا پڑے گی، اگر مذاکرات ناکام ہوئے تو کارروائی ناگزیر ہو سکتی ہے۔انہوں نے مزید کہا کہ ترکیہ اپنے مفادات اور خطے کے استحکام کے تحفظ کے لیے ہر ممکن اقدام کرے گا اور ماضی کی طرح ضروری فیصلوں سے گریز نہیں کرے گا۔طیب اردوان نے یہ بھی کہا کہ خطے میں جاری کشیدگی کے باوجود جنگ بندی کے دوران بھی عام شہریوں کو نشانہ بنایا جا رہا ہے، جو قابل مذمت ہے۔