روضہ رسولؐ پر وزیراعظم کی حاضری، عالمی امن اور ملک کی خوشحالی کیلئے خصوصی دعائیں

مدینہ منورہ( پاکستان خبر) وزیراعظم شہباز شریف نے روضہ رسولؐ پر حاضری دی اور ملک و قوم کی ترقی سمیت عالم اسلام اور دنیا بھر میں امن و استحکام کے لیے خصوصی دعائیں کیں۔وزیراعظم دفتر کے مطابق وزیراعظم جدہ سے مدینہ منورہ پہنچے جہاں گورنر مدینہ شہزادہ سلمان بن سلطان بن عبدالعزیز نے ان کا اور پاکستانی وفد کا پرتپاک استقبال کیا۔وزیراعظم نے مسجد نبویؐ میں حاضری کے دوران درود و سلام پیش کیا اور امت مسلمہ کی بھلائی، پاکستان کی خوشحالی اور عالمی امن کے لیے دعا کی، اس موقع پر وفد کے لیے روضہ رسولؐ کے دروازے خصوصی طور پر کھولے گئے۔ذرائع کے مطابق وزیراعظم اپنا دورہ سعودی عرب مکمل کرنے کے بعد مدینہ منورہ سے دوحہ روانہ ہوں گے جہاں امیر قطر شیخ تمیم بن حمد آل ثانی سے اہم ملاقات متوقع ہے، جس میں خطے کی صورتحال اور باہمی امور پر تبادلہ خیال کیا جائے گا۔