وزیراعظم شہباز شریف کا نیپرا کے سولر ریگولیشنز پر فوری نوٹس

اسلام آباد( پاکستان خبر) وزیراعظم شہباز شریف نے نیپرا کی جانب سے سولر کے حوالے سے نئے ریگولیشنز کے اجرا کا فوری نوٹس لیتے ہوئے پاور ڈویژن کو نظرثانی اپیل دائر کرنے کی ہدایت کی ہے۔ایکسپریس نیوز کے مطابق وزیراعظم نے کہا کہ پاور ڈویژن فوراً نیپرا کے سامنے سولر کے موجودہ صارفین کے کنٹریکٹس کے تحفظ کے لیے اپیل دائر کرے تاکہ موجودہ کنٹریکٹس کا ہر ممکن تحفظ یقینی بنایا جا سکے۔انہوں نے واضح کیا کہ سولر سے مستفید ہونے والے 4 لاکھ 66 ہزار صارفین کا بوجھ 3 کروڑ 76 لاکھ سے زائد نیشنل گرڈ کے صارفین پر نہیں پڑنا چاہیے۔ اس سلسلے میں پاور ڈویژن جامع لائحہ عمل تشکیل دے۔واضح رہے کہ وزیر اعظم کی زیر صدارت نیپرا کے نئے ریگولیشنز پر اعلی سطح کا خصوصی اجلاس آج اسلام آباد میں ہوا، جس میں نائب وزیرِ اعظم و وزیرِ خارجہ اسحاق ڈار، وفاقی وزرا احد خان چیمہ، عطااللہ تارڑ، علی پرویز ملک، سردار اویس خان لغاری، وزیرِ مملکت بلال اظہر کیانی، مشیر نجکاری محمد علی اور دیگر متعلقہ اعلیٰ حکام نے شرکت کی۔