شہباز شریف کے روسی دورے کے دوران ہو نے والابزنس فورم منسوخ

 اسلام آباد( کامرس ڈیسک) علاقائی کشیدگی اور غیر یقینی صورتحال کے پیش نظر وزیرِاعظم شہباز شریف کے آئندہ روسی دورے کے دوران 4 مارچ کو ہونے والا پاکستان روس بزنس فورم منسوخ کر دیا گیا ہے۔ذرائع کے مطابق بزنس فورم کی منسوخی کا فیصلہ باضابطہ طور پر کر لیا گیا ہے اور متعلقہ وفود کو آگاہ کر دیا گیا ہے۔ یہ فورم وزیرِاعظم کے دورے کے دوران منعقد ہونا تھا، جس میں 100 سے زائد پاکستانی کمپنیوں کی روسی کاروباری اداروں سے ملاقاتیں متوقع تھیں، تاہم موجودہ سکیورٹی اور فضائی حالات کی وجہ سے اس کی منسوخی ضروری قرار دی گئی۔اب تک وزیرِاعظم کے دورے کی باضابطہ منسوخی کا اعلان نہیں ہوا، تاہم بزنس فورم کی منسوخی کو موجودہ حالات کے پیشِ نظر ایک اہم پیشرفت قرار دیا جا رہا ہے۔