ایس آئی ایف سی سے پاکستان عالمی سرمایہ کاری کا مرکزبن گیا

اسلام آباد( کامرس ڈیسک)ایس آئی ایف سی کی مؤثر سفارتی اور معاشی حکمتِ عملی کے نتیجے میں پاکستان عالمی سطح پر اسٹریٹجک شراکت داریوں کے ایک نئے مرحلے میں داخل ہو چکا ہے۔ عالمی سرمایہ کاری اور باہمی تعاون کے ذریعے ملک میں تجارت، زراعت اور توانائی کے شعبوں کو مضبوط بنانے پر عملی پیش رفت جاری ہے۔اسی سلسلے میں وفاقی وزیر تجارت جام کمال خان اور کینیڈا کے ہائی کمشنر طارق علی خان کے درمیان ایک اہم ملاقات منعقد ہوئی، جس میں دوطرفہ تجارت، سرمایہ کاری، معدنیات، زراعت اور توانائی کے شعبوں میں تعاون بڑھانے پر تفصیلی گفتگو کی گئی۔ملاقات کے دوران پاکستان کی جانب سے دنیا کی سب سے بڑی معدنیاتی کانفرنس پراسپییکٹرز اینڈ ڈیولپرز ایسوسی ایشن آف کینیڈا 2026 میں شرکت کے معاملے پر بھی تبادلہ خیال ہوا۔ اس کانفرنس کے ذریعے پاکستان کے معدنی وسائل کو عالمی سرمایہ کاروں کے سامنے اجاگر کیا جائے گا جبکہ مقامی کان کنی کمپنیوں کو کینیڈین ماہرین سے رابطے کے مواقع بھی میسر آئیں گے۔