رمضان میں مہنگائی اور پٹرول کی قیمتوں میں اضافہ، مایا علی بھی بول اٹھیں

لاہور( شوبز ڈیسک)معروف اداکارہ مایا علی نے رمضان المبارک کے دوران مہنگائی اور پٹرول کی بڑھتی قیمتوں پر تشویش کا اظہار کرتے ہوئے کہا ہے کہ ایسے فیصلے پہلے ہی مشکلات میں گھرے عوام کے لیے مزید پریشانی کا سبب بن رہے ہیں۔انہوں نے سماجی رابطے کی ویب سائٹ کے ذریعے اپنے پیغام میں حکام اور عوام سے اپیل کی کہ روزانہ اجرت پر کام کرنے والے افراد کے حالات پر بھی توجہ دی جائے اور ان کی مشکلات کو سمجھا جائے۔مایا علی کا کہنا تھا کہ وہ اس بات کو تسلیم کرتی ہیں کہ بعض اوقات معاشی یا سیاسی حالات کے باعث حکومت کو سخت فیصلے کرنا پڑتے ہیں اور اگر ملک کسی جنگی صورتحال سے گزر رہا ہو تو مسائل مزید بڑھ سکتے ہیں۔ تاہم ایسے وقت میں ان افراد کو نظر انداز نہیں کیا جانا چاہیے جن کے گھروں کا نظام روزانہ کی کمائی پر چلتا ہے۔اداکارہ کے مطابق بہت سے لوگ ایسے ہیں جن کے پاس صرف موٹر سائیکل ہوتی ہے اور وہ روزانہ سفر کر کے کام پر جاتے ہیں تاکہ اپنے خاندان کا پیٹ پال سکیں۔ انہوں نے کہا کہ جب ایندھن کی قیمتیں بڑھتی ہیں تو اس کا سب سے زیادہ اثر انہی افراد پر پڑتا ہے جو روزانہ محنت مزدوری کر کے اپنی روزی کماتے ہیں۔مایا علی نے مزید کہا کہ رمضان المبارک کے مہینے میں عوام حکومت سے کسی حد تک ریلیف کی امید رکھتے ہیں کیونکہ مہنگائی کے باعث بہت سے خاندان پہلے ہی شدید مالی دباؤ کا شکار ہیں۔ ان کا کہنا تھا کہ بہت سے لوگوں کی تنخواہیں اور یومیہ آمدنی اتنی نہیں کہ وہ بڑھتی ہوئی مہنگائی کا بوجھ آسانی سے برداشت کر سکیں جبکہ بیشتر افراد کے لیے گھر بیٹھنا بھی ممکن نہیں کیونکہ انہیں اپنے خاندان کی کفالت کے لیے مسلسل کام کرنا پڑتا ہے۔