اگر میں مہدی حسن ہوتا تو فیصلہ مختلف ہوتا:سلمان علی آغا کا متنازع رن آؤٹ پر ردعمل

 لاہور(سپور ٹس ڈیسک)پاکستانی آل راؤنڈر سلمان علی آغا نے بنگلادیش کے خلاف میچ میں اپنے متنازع رن آؤٹ پر ردعمل دیتے ہوئے کہا ہے کہ اگر وہ مہدی حسن کی جگہ ہوتے تو معاملہ بالکل مختلف انداز میں ہینڈل کرتے۔ان خیالات کا اظہار سلمان علی آغا نے ڈھاکا میں میچ کے اختتام پر پریس کانفرنس کے دوران کیا۔میچ کے دوران سلمان آغا نان اسٹرائیکر اینڈ پر بولر کے رن اپ کے ساتھ کریز سے باہر نکل گئے تھے۔ محمد رضوان نے شاٹ کھیلا تو گیند سیدھی سلمان علی آغا کے بلے سے ٹکرا کر رک گئی۔ سلمان علی آغا نے گیند اٹھانے کی کوشش کی لیکن اسی لمحے مہدی حسن نے گیند پکڑ کر وکٹ پر مار دی، جس کے بعد تھرڈ امپائر نے انہیں آؤٹ قرار دیا۔اس فیصلے پر سلمان علی آغا شدید ناراض نظر آئے اور غصے میں اپنے دستانے اور ہیلمٹ زمین پر پھینک دیے۔