ہالی وڈ اداکارہ نے پاکستانی بیگ سے دنیا کی توجہ حاصل کر لی

لاہور( شوبز ڈیسک) ہالی وڈ کی معروف اداکارہ این ہیتھوے نے اپنی نئی فلم دا ڈیول ویئرز پراڈا 2 کی تشہیری سرگرمیوں کے دوران پاکستانی فیشن کو عالمی سطح پر اجاگر کر دیا۔میکسیکو سٹی میں منعقدہ تقریبات کے دوران اداکارہ نے پاکستان کے فیشن برینڈ وارپ کا تیار کردہ سیاہ رنگ کا بیگ استعمال کیا، جس نے سوشل میڈیا پر غیر معمولی توجہ حاصل کی۔اس موقع پر این ہیتھوے سیاہ رنگ کے خوبصورت لباس میں ملبوس تھیں جس پر سنہری کام کیا گیا تھا، جبکہ پاکستانی برینڈ کا بیگ ان کی شخصیت اور انداز کو مزید دلکش بنا رہا تھا۔ برینڈ کے سماجی رابطے کے صفحے پر بھی اداکارہ کی تصاویر اور ویڈیوز شیئر کی گئیں۔برینڈ کی ویب سائٹ کے مطابق اداکارہ نے ٹوبلا بلیک نامی بیگ استعمال کیا، جبکہ وائرل ویڈیوز میں دیکھا جا سکتا ہے کہ میکسیکو سٹی پہنچنے پر مداحوں نے ان کا پرتپاک استقبال کیا۔یہ فلم 2006 میں ریلیز ہونے والی مقبول فلم کا تسلسل ہے، جس کا شائقین طویل عرصے سے انتظار کر رہے تھے۔ نئی فلم میں ایک بار پھر مرکزی کردار پیش کیے جائیں گے جبکہ اس بار کئی نئے اداکار بھی کہانی کا حصہ ہوں گے۔ فلم یکم مئی کو سینما گھروں میں نمائش کے لیے پیش کی جائے گی۔واضح رہے کہ اس سے قبل بھی اس پاکستانی برینڈ کی مصنوعات کو مختلف عالمی شخصیات استعمال کر چکی ہیں، جس سے اس کی مقبولیت میں مسلسل اضافہ ہو رہا ہے۔