حکومت نے موبائل ایپ پر مبنی ایندھن کوٹہ سسٹم کو حتمی شکل دے دی، سبسڈی کم آمدنی والے طبقے تک محدود

اسلام آباد( پاکستان خبر) حکومت نے موٹر سائیکلوں، رکشوں اور 800 سی سی تک گاڑیوں کے لیے موبائل ایپلیکیشن پر مبنی ایندھن کوٹہ سسٹم کو حتمی شکل دے دی ہے۔ اس اقدام کا مقصد کم آمدنی والے طبقے کے لیے ٹارگٹڈ سبسڈی کو یقینی بنانا اور ایندھن کی کھپت کو کم کرنا ہے۔سرکاری اہلکاروں کے مطابق ایندھن کی فراہمی کے نظام کی تفصیلات آئل اینڈ گیس ریگولیٹری اتھارٹی (اوگرا)، وزارت خزانہ، پیٹرولیم اور انفارمیشن ٹیکنالوجی کے حکام نے جانچنے کے بعد حتمی کی ہیں۔ حکومت اب اس بارے میں فیصلہ کرے گی کہ آیا اس اسکیم کو چھوٹی کاروں تک بڑھایا جائے یا اسے دو اور تین پہیوں والی گاڑیوں تک محدود رکھا جائے۔منصوبے کے تحت ہر ریٹیل آؤٹ لیٹ میں کم از کم دو موبائل فون لازمی ہوں گے، جبکہ صارفین اپنی ایپ کے ذریعے ڈیجیٹل واؤچر تیار کریں گے۔ ریٹیل فروش واؤچر اسکین یا داخل کرے گا، جس سے سسٹم خود بخود دستیاب کوٹے کی توثیق کرے گا۔ مثال کے طور پر اگر صارف 20 لیٹر طلب کرے اور اس کا کوٹہ 15 لیٹر ہو، تو صرف 15 لیٹر فراہم کیا جائے گا۔حکومت نے واضح کیا کہ سبسڈی دو اور تین پہیوں والی گاڑیوں کے لیے مخصوص ڈسپنسر یا نوزلز کے ذریعے فراہم کی جائے گی تاکہ تقسیم میں آسانی ہو۔ تمام آئل مارکیٹنگ کمپنیوں کو اسکیم کے موثر نفاذ کے لیے فوکل پرسنز مقرر کرنے اور 24 گھنٹے نگرانی فراہم کرنے کی ہدایت دی گئی ہے۔حکام کے مطابق موجودہ عالمی تیل کی قیمتوں میں اضافہ مشرق وسطیٰ کی جنگ اور آبنائے ہرمز میں جہازوں کے پھنسنے کی وجہ سے ہوا ہے، جبکہ ملکی طلب میں کمی نہیں آئی۔ حکومت نے قیمتوں میں دو ہفتوں کے لیے کوئی تبدیلی نہ کرنے کی لاگت کا تخمینہ 70 ارب روپے لگایا ہے۔یہ اسکیم کم آمدنی والے صارفین کے لیے سبسڈی کو ہدف بنا کر شفاف اور مؤثر طریقے سے فراہم کرنے کی اہم پیش رفت سمجھی جا رہی ہے۔