پاک بھارت میچ بائیکاٹ پر عالمی کرکٹ بورڈز متحرک

دبئی( سپورٹس ڈیسک)ٹی20 ورلڈ کپ 2026 میں پاکستان کی جانب سے بھارت کے خلاف میچ نہ کھیلنے کے فیصلے پر عالمی کرکٹ حلقوں میں تشویش بڑھتی جا رہی ہے۔ جہاں آئی سی سی اس صورتحال پر فکرمند ہے، وہیں مختلف ممالک کے کرکٹ بورڈز بھی اس فیصلے کے ممکنہ اثرات پر غور کر رہے ہیں۔ اسی سلسلے میں سری لنکا کے بعد اب اماراتی کرکٹ بورڈ نے بھی پاکستان سے اپنے فیصلے پر نظرِ ثانی کی درخواست کی ہے۔میڈیا رپورٹس کے مطابق اماراتی کرکٹ بورڈ نے پاکستان کرکٹ بورڈ سے باضابطہ رابطہ کرتے ہوئے 15 فروری کو بھارت کے خلاف شیڈول میچ نہ کھیلنے کے فیصلے پر دوبارہ غور کرنے پر زور دیا ہے۔ اماراتی حکام کا کہنا ہے کہ کرکٹ کے وسیع تر مفاد اور ٹورنامنٹ کی مجموعی اہمیت کو مدنظر رکھتے ہوئے اس معاملے میں لچک دکھانا ضروری ہے۔اس سے قبل سری لنکا کرکٹ بھی اسی نوعیت کی اپیل کر چکا ہے۔ سری لنکا کرکٹ کی جانب سے پی سی بی کو تحریری طور پر آگاہ کیا گیا تھا کہ کولمبو میں 15 فروری کو طے شدہ پاک بھارت میچ کی منسوخی سے نہ صرف کرکٹ بورڈ بلکہ ملکی معیشت کو بھی بھاری مالی نقصان کا سامنا کرنا پڑ سکتا ہے۔خط میں بتایا گیا کہ میچ کے لیے تمام انتظامات مکمل کیے جا چکے ہیں، ٹکٹس فروخت ہو چکے ہیں اور میچ کی منسوخی کی صورت میں سیاحت سے وابستہ آمدن بھی شدید متاثر ہو گی۔ سری لنکا کرکٹ کے مطابق بائیکاٹ کے اعلان کے بعد شائقین کی بڑی تعداد نے ہوٹل بکنگز منسوخ کر دی ہیں جس سے سیاحتی شعبہ دباؤ کا شکار ہو گیا ہے۔بیان میں اس بات کی بھی نشاندہی کی گئی کہ سری لنکا کرکٹ نے ماضی میں مشکل حالات میں پاکستان کرکٹ بورڈ کا بھرپور ساتھ دیا ہے، اس لیے غیر معمولی حالات، دیرینہ تعلقات اور کرکٹ کے مجموعی مفاد کو سامنے رکھتے ہوئے فیصلے پر نظرِ ثانی کی اپیل کی گئی ہے۔دوسری جانب حکومتِ پاکستان کی ہدایت پر قومی ٹیم کو بھارت کے خلاف میچ کھیلنے سے روکا گیا ہے، تاہم اطلاعات کے مطابق آئی سی سی کی جانب سے پاکستان کو آمادہ کرنے کے لیے سفارتی سطح پر کوششیں جاری ہیں۔