ایف بی آر کا ریونیو شارٹ فال 430 ارب روپے، مالی دباؤ میں اضافہ

اسلام آباد( کامرس ڈیسک)فیڈرل بورڈ آف ریونیو (ایف بی آر) نے رواں مالی سال 26-2025 کے پہلے 8 ماہ (جولائی تا فروری) کے دوران ریونیو شارٹ فال تقریباً 430 ارب روپے ریکارڈ کیا ہے، جبکہ صرف فروری 2026 میں ہی 85 ارب روپے کا ریونیو شارٹ فال سامنے آیا۔ذرائع کے مطابق بڑھتے ہوئے ریونیو شارٹ فال نے وفاقی حکومت کی مالی صورت حال پر دباؤ میں اضافہ کر دیا ہے۔ جولائی تا فروری مجموعی طور پر ایف بی آر نے 8,120 ارب روپے جمع کیے، جبکہ اس مدت کے لیے مقررہ ہدف 8,550 ارب روپے تھا۔فروری میں عبوری طور پر 944 ارب روپے وصول ہوئے، جبکہ ہدف ایک ہزار 29 ارب روپے مقرر تھا۔ ایف بی آر کا یہ شارٹ فال ایسے وقت میں سامنے آیا ہے جب عالمی مالیاتی ادارہ (آئی ایم ایف) پاکستان میں تیسرے اقتصادی جائزے کے لیے موجود ہے، اور ٹیکس ہدف پر نظر ثانی کے لیے بات چیت متوقع ہے۔