پیٹرول قیمت میں کمی کے باوجود شہریوں نے حکومتی ریلیف کو ناکافی قرار دے دیا

اسلام آباد ( پاکستان خبر) پیٹرول کی قیمت میں نمایاں کمی کے باوجود شہریوں نے حکومتی ریلیف کو ناکافی قرار دے دیا ہے، جبکہ موٹر سائیکل سوار تاحال اعلان کردہ رعایت کے منتظر ہیں۔شہباز شریف کی جانب سے اعلان کے بعد پاکستان میں پیٹرول کی قیمت چار سو اٹھاون روپے سے کم ہو کر تین سو اٹھہتر روپے فی لیٹر مقرر کر دی گئی ہے اور ملک بھر میں نئی قیمتوں پر فروخت جاری ہے۔تاہم شہریوں کا کہنا ہے کہ اسی روپے کمی کے باوجود پیٹرول اب بھی مہنگا ہے اور عام آدمی کی پہنچ سے باہر ہے، جس کے باعث مہنگائی کا دباؤ برقرار ہے اور روزمرہ زندگی متاثر ہو رہی ہے۔شہریوں کے مطابق مہنگے ایندھن کے اثرات تمام شعبہ ہائے زندگی پر پڑتے ہیں، جس سے اخراجات میں مسلسل اضافہ ہو رہا ہے اور تنخواہ دار طبقہ شدید مشکلات کا شکار ہے۔دوسری جانب حکومت کی جانب سے موٹر سائیکل سواروں کے لیے فی لیٹر ایک سو روپے رعایت کے اعلان کے باوجود اس پر عملدرآمد کے لیے طریقہ کار تاحال سامنے نہیں آ سکا، جس پر بائیک سواروں میں تشویش پائی جا رہی ہے۔علاوہ ازیں ڈیزل کی قیمت میں کمی نہ ہونے کے باعث ٹرانسپورٹ کرایوں میں اضافہ برقرار ہے، جس کے باعث عوام کو سفر کے لیے زیادہ اخراجات برداشت کرنا پڑ رہے ہیں۔