امریکی ریئلٹی شو ’نیکسٹ لیول شیف‘ میں شریک پاکستانی نژاد شیف مریم اشتیاق نے اپنی مہارت سے بین الاقوامی سطح پر دھوم مچائی ہے۔ انہوں نے مقابلے کے دوران تندوری چکن تیار کی، جو نہ صرف ججز بلکہ برطانوی سیلیبریٹی شیف گارڈن رامسے کی بھی توجہ کا مرکز بن گئی۔ رامسے نے پاکستانی کھانوں کی دل کھول کر تعریف کی اور انہیں دنیا کے بہترین ذائقہ دار پکوانوں میں شمار کیا۔
مریم اشتیاق اس شو میں پاکستان کی نمائندگی کرتے ہوئے اپنے کھانوں کی بدولت پاکستان کا نام روشن کر رہی ہیں۔ انہوں نے اپنی ایک ویڈیو انسٹاگرام پر شیئر کی، جس پر مداحوں نے ان کی خوب حوصلہ افزائی کی۔ پاکستانی اداکاراؤں منشا پاشا اور یمنیٰ زیدی نے بھی ان کی کاوشوں کو سراہتے ہوئے ویڈیو کو اپنی انسٹا اسٹوریز پر ری شیئر کیا۔
امریکی شو میں مختلف ممالک سے شریک شیفز اپنی صلاحیتوں کا مظاہرہ کر رہے ہیں، مگر مریم کی محنت اور ذائقے دار پکوانوں نے انہیں نمایاں کر دیا ہے۔ دیکھنا یہ ہے کہ آئندہ مقابلوں میں وہ کس حد تک کامیابی حاصل کرتی ہیں۔
