اداکارہ نیلم منیر کی اچانک شادی کی خبر نے سوشل میڈیا پر ہلچل مچادی ہے۔ حالیہ دنوں میں نیلم منیر کی شادی کی خبریں سامنے آئیں، جس کے بعد صارفین کی جانب سے دلچسپ اور حیرت انگیز تبصرے کیے جا رہے ہیں۔ یاد رہے کہ کچھ روز قبل ہی نیلم منیر نے ایک انٹرویو میں شادی کے بارے میں بات کرتے ہوئے کہا تھا کہ وہ فی الحال یا مستقبل قریب میں شادی کے بارے میں نہیں سوچ رہی ہیں، لیکن ان کی اچانک شادی نے سب کو ششدر کر دیا۔
نیلم منیر نے دبئی کے ایک بزنس مین سے شادی کی ہے، جس پر سوشل میڈیا پر مختلف تبصرے کیے جا رہے ہیں۔ صارفین کے لیے سب سے بڑی حیرانی یہ ہے کہ اداکارہ کا شوہر دبئی سے ہے اور وہ ایک کاروباری شخصیت ہیں، جس کی معلومات ابھی تک عام نہیں کی گئی۔ سوشل میڈیا پر کچھ صارفین نے نیلم منیر کے دبئی میں شادی کرنے پر مزاحیہ انداز میں تبصرے کیے، ایک صارف نے لکھا کہ “نیلم منیر نے ’حبیبی کم ٹو دبئی‘ کو بہت سنجیدہ طور پر لے لیا ہے”۔
نیلم منیر کی نکاح کی پوسٹ پر کئی دلچسپ اور چٹکلے بھرے تبصرے کیے گئے، جیسے کہ “شیخ بہت شریف انسان لگ رہا ہے، اللّٰہ جوڑی سلامت رکھے” اور “نیلم منیر نے خوبصورت اور مکمل لباس پہنا ہے۔” کچھ صارفین نے اداکارہ کی شادی پر اعتراض بھی کیا، ایک نے سوال کیا کہ “اداکارہ کس نمبر کی اہلیہ بنی ہیں؟”۔
ایک اور صارف نے دعویٰ کیا کہ نیلم منیر کی شادی کو ایک ماہ ہو چکا ہے، جبکہ سوشل میڈیا پر یہ پوسٹ دیر سے کی گئی ہے۔ ان تمام تبصروں اور چٹکلوں نے اس شادی کو سوشل میڈیا پر ایک دلچسپ موضوع بنا دیا ہے، اور مداح نیلم منیر کے شوہر کے بارے میں مزید معلومات حاصل کرنے کے لیے بے تاب ہیں۔
نیلم منیر کی شادی کا معاملہ اس وقت توجہ کا مرکز بنا ہوا ہے، اور اس پر سوشل میڈیا پر چلنے والی دلچسپ گفتگو اس بات کا ثبوت ہے کہ اداکارہ کی زندگی میں اتنی بڑی تبدیلی نے مداحوں کو خوب محظوظ کیا ہے۔
