وینزویلا معاملہ، سلامتی کونسل کا ہنگامی اجلاس طلب

نیویارک(مانیٹرنگ ڈیسک) اقوامِ متحدہ کی سلامتی کونسل پیر کے روز ایک ہنگامی اجلاس منعقد کرے گی، جس میں وینزویلا میں امریکا کی فوجی کارروائی پر بڑھتی ہوئی عالمی تشویش اور بین الاقوامی نظام کو لاحق ممکنہ خطرات پر غور کیا جائے گا۔اقوامِ متحدہ کے سیکریٹری جنرل انتونیو گوتریس نے خبردار کیا ہے کہ وینزویلا میں حالیہ پیش رفت بین الاقوامی قانون کے لیے ایک خطرناک مثال بن سکتی ہے۔ ان کے ترجمان کے مطابق سیکریٹری جنرل کو اس بات پر شدید تشویش ہے کہ امریکی کارروائی سے خطے میں عدم استحکام پیدا ہو سکتا ہے اور اقوامِ متحدہ کے چارٹر کے اصولوں کی خلاف ورزی کے خدشات موجود ہیں۔یہ ہنگامی اجلاس کولمبیا کی درخواست پر بلایا گیا ہے، جس کی چین اور روس نے حمایت کی ہے، جبکہ وینزویلا نے بھی باضابطہ طور پر سلامتی کونسل سے رجوع کر لیا ہے۔اجلاس بین الاقوامی امن و سلامتی کو لاحق خطرات کے ایجنڈے کے تحت منعقد ہوگا اور سیکریٹری جنرل کونسل کے ارکان کو صورتحال پر تفصیلی بریفنگ دیں گے۔