بارشیں اور جنگی اثرات، روئی کی قیمت نئی بلند ترین سطح پر پہنچ گئی

کراچی ( کامرس ڈیسک) حالیہ بارشوں، کپاس کی فصل کو پہنچنے والے نقصان اور خلیجی کشیدگی کے باعث درآمدی سرگرمیوں میں تعطل نے مقامی کاٹن مارکیٹ میں قیمتوں کو نئی بلندی پر پہنچا دیا ہے۔گزشتہ ہفتے کے دوران فی من روئی کی قیمت بیس ہزار روپے تک جا پہنچی، جو رواں سیزن کی بلند ترین سطح قرار دی جا رہی ہے، جبکہ آئندہ دنوں میں مزید اضافے کا امکان بھی ظاہر کیا جا رہا ہے۔ماہرین کے مطابق حالیہ بارشوں سے پہلے سے کاشت شدہ کپاس کی فصل متاثر ہوئی ہے، جس کے باعث پیداوار کے خدشات بڑھ گئے ہیں، دوسری جانب بیرون ملک سے روئی کی درآمد میں رکاوٹ نے بھی مارکیٹ پر دباؤ بڑھا دیا ہے۔تجزیہ کاروں کا کہنا ہے کہ اگر علاقائی سطح پر جاری مذاکرات کامیاب ہو جاتے ہیں اور ہمسایہ ملک سے روئی کی درآمد بحال ہو جاتی ہے تو قیمتوں میں کچھ کمی آ سکتی ہے، بصورت دیگر مہنگائی کا رجحان برقرار رہنے کا امکان ہے۔ماہرین کے مطابق چند ماہ قبل درجہ حرارت میں اضافے کے باعث کپاس کی کاشت میں تیزی آئی تھی اور بیرونی منڈیوں سے درآمد کے سبب قیمتوں میں کمی دیکھنے میں آئی تھی، تاہم موجودہ حالات نے صورتحال یکسر بدل دی ہے۔