نان بینکنگ سیکٹر کے اثاثوں میں 21 فیصد اضافہ ریکارڈ

کراچی(کامرس ڈیسک)رواں مالی سال کی پہلی ششماہی کے دوران غیر بینکاری مالیاتی شعبے کے اثاثوں کی مالیت بڑھ کر 6.84 کھرب روپے تک پہنچ گئی۔سیکیورٹیز اینڈ ایکسچینج کمیشن آف پاکستان کے تازہ ترین اعداد و شمار کے مطابق رواں سال کے ابتدائی چھ ماہ میں نان بینکنگ سیکٹر کے اثاثوں میں 21 فیصد اضافہ ریکارڈ کیا گیا۔ جون 2025 میں یہ حجم 5.63 کھرب روپے تھا جو دسمبر 2025 تک بڑھ کر 6.84 کھرب روپے ہوگیا۔اعداد و شمار کے مطابق میوچل فنڈز کے اثاثوں کی مالیت 4.5 کھرب روپے تک پہنچ گئی جبکہ فنڈز کی تعداد 369 سے بڑھ کر 409 ہوگئی۔ اسی عرصے میں میوچل فنڈ سرمایہ کاری اکاؤنٹس کی تعداد بڑھ کر 8 لاکھ 45 ہزار تک جا پہنچی۔جون 2025 کے بعد نئے میوچل فنڈ اکاؤنٹس میں 8 فیصد اضافہ ریکارڈ کیا گیا۔ سرمایہ کاری کے رجحانات کے مطابق منی مارکیٹ فنڈز میں 44 فیصد، انکم فنڈز میں 23 فیصد جبکہ ایکویٹی فنڈز میں 14 فیصد سرمایہ کاری کی گئی۔