نیپرا میں بجلی مہنگی کرنے کی درخواست کی سماعت مکمل، فیصلہ محفوظ

اسلام آباد( کامرس ڈیسک) شہر قائد سمیت ملک بھر میں بجلی مہنگی ہونے کا امکان ہے، جس کے لیے نیشنل الیکٹرک پاور ریگولیٹری اتھارٹی نیپرا میں سماعت مکمل کر لی گئی ہے۔سماعت سی پی پی اے کی جانب سے کراچی سمیت ملک بھر کے لیے ماہانہ ایڈجسٹمنٹ کے تحت بجلی ایک روپے 78 پیسے فی یونٹ بڑھانے کی درخواست پر ہوئی، اور نیپرا نے اپنا فیصلہ محفوظ کر لیا ہے جو بعد میں جاری کیا جائے گا۔جنوری کی ماہانہ ایڈجسٹمنٹ کی درخواست میں سینٹرل پاور پرچیزنگ ایجنسی سی پی پی اے نے بتایا کہ جنوری میں 8 ارب 76 کروڑ یونٹ بجلی فروخت ہوئی، جبکہ فی یونٹ فیول لاگت کا تخمینہ 10 روپے 39 پیسے تھا لیکن اصل لاگت 12 روپے 17 پیسے رہی۔ سی پی پی اے حکام نے کہا کہ پن بجلی سے کم پیداوار اور زیادہ کھپت کی وجہ سے قیمت میں اضافہ ہوا۔ممبر نیپرا پنجاب آمنہ احمد نے سماعت کے دوران کہا کہ بجلی کی قیمتیں بڑھ رہی ہیں اور فرنس آئل والے پلانٹس کے استعمال پر سوال اٹھایا۔ حکام نے جواب دیا کہ پیک ڈیمانڈ پوری کرنے کے لیے یہ پلانٹس چلائے گئے۔ممبر نیپرا مقصود انور نے کہا کہ اضافہ فرنس آئل کے استعمال کی وجہ سے مانگا گیا۔ سی پی پی اے کی درخواست کے مطابق یہ اضافہ حکومتی پالیسی گائیڈلائنز کے تحت تمام الیکٹرک صارفین پر نافذ ہوگا۔