مودی حکومت نے امریکی لابنگ فرم کی خدمات حاصل کر لیں

ممبئی( مانیٹرنگ ڈیسک)بھارت میں یہ انکشاف ہوا ہے کہ وزیر اعظم نریندر مودی کی حکومت نے امریکی صدر ڈونلڈ ٹرمپ اور وائٹ ہاس پر اثر انداز ہونے کے لیے ایک امریکی لابنگ فرم کی خدمات حاصل کی ہیں۔ اس فرم کی سرگرمیوں میں سوشل میڈیا پر موجود مواد کی نگرانی اور فلیگ کرنا شامل ہے۔ذرائع کے مطابق مودی حکومت نے اپریل 2025 سے امریکی لابنگ کمپنی SHW Partners LLC کی خدمات حاصل کر رکھی ہیں، جس پر سالانہ تقریبا 18 لاکھ ڈالر خرچ کیے جا رہے ہیں جبکہ ماہانہ ادائیگی ڈیڑھ لاکھ ڈالر بنتی ہے۔ناقدین کا کہنا ہے کہ یہ اقدام ایسے وقت میں سامنے آیا ہے جب وزیر اعظم مودی گزشتہ گیارہ برسوں میں باضابطہ پریس کانفرنس کرنے یا کھلے مکالمے کو ترجیح دینے سے گریز کرتے رہے ہیں۔ تنقید کرنے والے مزید کہتے ہیں کہ یک طرفہ ابلاغ اور سفارتی صلاحیتوں کی کمی کے باعث بھارت کو مالی نقصان بھی اٹھانا پڑ رہا ہے۔