لاہور ہائیکورٹ نے پتنگ بازی پر حفاظتی پلان طلب کر لیا

لاہور ( ترکیہ خبر)لاہور ہائیکورٹ نے پتنگ بازی کی اجازت دینے والے نوٹیفکیشن کے حوالے سے پولیس حکام کو شہریوں کے تحفظ کے لیے حفاظتی پلان پیش کرنے کی ہدایت کر دی۔لاہور ہائیکورٹ میں کائٹ فلائنگ آرڈیننس اور ڈی سی کی بسنت اجازت کے نوٹیفکیشن کے خلاف دائر متفرق درخواست پر سماعت ہوئی، جس میں جسٹس ملک اویس خالد نے جوڈیشل ایکٹوازم پینل کی درخواست پر کارروائی کی۔درخواست گزار کے وکیل اظہر صدیق نے مقف اختیار کیا کہ پتنگ بازی کے دوران شہریوں کی جان و مال کا تحفظ ہر شہری کا بنیادی حق ہے، لہذا عدالت سے استدعا کی کہ کائٹ فلائنگ آرڈیننس اور پتنگ بازی کی اجازت سے متعلق نوٹیفکیشن کو کالعدم قرار دیا جائے۔ درخواست میں شامل تصاویر میں ایک بچے کو گلا کٹا ہوا بھی دکھایا گیا تھا۔عدالت نے ایڈیشنل سیکرٹری جوڈیشل سے استفسار کیا کہ شہریوں کی حفاظت کے لیے کیا اقدامات کیے گئے ہیں اور سیفٹی کیسے یقینی بنائی جائے گی۔ سماعت کے دوران عدالت نے آئی جی پنجاب اور سی سی پی او کو ہدایت کی کہ وہ حفاظتی پلان تیار کر کے پیش کریں۔اسسٹنٹ ایڈووکیٹ جنرل انوار حسین نے اعتراض کیا کہ آرڈیننس اب ایکٹ بن چکا ہے، اس لیے درخواست قابل سماعت نہیں۔ تاہم عدالت نے کہا کہ قانونی پہلو بعد میں دیکھے جائیں گے، اور یہ درخواست شہریوں کی جان و مال کے تحفظ سے متعلق دائر کی گئی ہے۔