سٹاک مارکیٹ میں تاریخی تیزی، کاروبار عارضی طور پر معطل

کراچی ( کامرس ڈیسک) پاکستان کی کامیاب سفارت کاری کے نتیجے میں ایران اور امریکا کے درمیان جنگ بندی کے معاشی اثرات فوری طور پر سامنے آ گئے، جس سے سٹاک مارکیٹ میں زبردست تیزی دیکھنے میں آئی۔بدھ کے روز پاکستان سٹاک ایکسچینج میں بارہ ہزار نو سو بیس پوائنٹس کا نمایاں اضافہ ریکارڈ کیا گیا، جس کے بعد کے ایس ای سو انڈیکس ایک لاکھ چونسٹھ ہزار پانچ سو چورانوے پوائنٹس کی سطح تک پہنچ گیا۔پی ایس ایکس انتظامیہ کے مطابق غیر معمولی تیزی کے باعث کاروباری سرگرمیوں کو ایک گھنٹے کے لیے معطل کر دیا گیا۔کاروبار کے آغاز پر ہی کے ایس ای تیس انڈیکس میں پانچ فیصد سے زائد اضافے کے باعث صبح نو بج کر سینتیس منٹ پر ٹریڈنگ روک دی گئی، جسے بعد ازاں دس بج کر بیالیس منٹ پر بحال کیا گیا۔کاروبار کی بحالی کے بعد بھی تیزی کا رجحان برقرار رہا اور انڈیکس بارہ ہزار سات سو تیس پوائنٹس اضافے کے ساتھ ایک لاکھ چونسٹھ ہزار چار سو چار پوائنٹس کی سطح تک پہنچ گیا، جس سے سرمایہ کاروں کے اعتماد میں نمایاں اضافہ ظاہر ہوتا ہے۔