ای سی سی کی منظوری: پاسکو کے 5 لاکھ میٹرک ٹن گندم مسابقتی بولی پر فروخت

اسلام آباد ( کامرس ڈیسک)اسلام آباد میں کابینہ کی اقتصادی رابطہ کمیٹی (ای سی سی) نے پاسکو کے پاس موجود 5 لاکھ میٹرک ٹن گندم کو مسابقتی بولی کے ذریعے فروخت کرنے کی منظوری دے دی۔وفاقی وزیر برائے خزانہ و محصولات سینیٹر محمد اورنگزیب کی زیر صدارت ہونے والے اجلاس میں وفاقی وزیر برائے پیٹرولیم علی پرویز ملک، وفاقی وزیر برائے قومی غذائی تحفظ و تحقیق رانا تنویر حسین، وزیرِ اعظم کے معاونِ خصوصی برائے صنعت و پیداوار ہارون اختر خان اور دیگر اعلیٰ حکام شریک تھے۔ وفاقی وزیر برائے سرمایہ کاری قیصر احمد شیخ نے ویڈیو لنک کے ذریعے اجلاس میں شرکت کی۔اجلاس میں بتایا گیا کہ پہلے منظور شدہ ریزرو قیمتوں پر گندم فروخت کرنے کی کوشش ناکام رہی کیونکہ کم بولیاں موصول ہوئیں۔ موجودہ ذخیرہ اندوزی اور اخراجات کو مدنظر رکھتے ہوئے ای سی سی نے فیصلہ کیا کہ 5 لاکھ میٹرک ٹن گندم کو فرسٹ اِن، فرسٹ آؤٹ (ایف آئی ایف او) بنیاد پر نئی مقرر کردہ ریزرو قیمتوں پر فروخت کیا جائے۔مقررہ قیمتیں مقامی گندم کے لیے فی 40 کلو 4 ہزار 150 روپے اور درآمدی گندم کے لیے فی 40 کلو 3 ہزار 800 روپے طے کی گئی ہیں۔