پشاور میں شدید سردی اور دھند کا راج

پشاور( پاکستان خبر)پشاور اور اس کے نواحی علاقے گہرے بادلوں کے لپیٹ میں ہیں، جبکہ موسم بھی شدید سرد ہے۔محکمہ موسمیات کے مطابق خیبر پختونخوا کے بیشتر اضلاع میں موسم خشک اور سرد رہے گا، جبکہ بالائی اضلاع میں درجہ حرارت مزید کم ہونے کا امکان ہے۔ صوبے کے میدانی علاقوں پشاور، چارسدہ، نوشہرہ، مردان، صوابی، کرک اور بنوں میں دھند چھائے رہنے کا امکان ہے۔لکی مروت، ڈیرہ اسماعیل خان اور جی ٹی روڈ کے مختلف حصوں میں صبح و رات کے اوقات میں دھند کی شدت بڑھ سکتی ہے۔ گزشتہ روز دیر اور باجوڑ میں بعض مقامات پر ہلکی بارش بھی ریکارڈ کی گئی۔محکمہ موسمیات کے مطابق سب سے زیادہ سردی کالام میں منفی 6 ڈگری سینٹی گریڈ ریکارڈ کی گئی، جبکہ پاراچنار اور مالم جبہ میں منفی 3، دیر بالا میں منفی 2، اور دروش و چترال میں منفی 1 ڈگری رہی۔ پشاور اور ڈیرہ اسماعیل خان میں درجہ حرارت 6 ڈگری سینٹی گریڈ ریکارڈ کیا گیا۔دوسری جانب، پی آئی اے کے مطابق باچا خان انٹرنیشنل ایئرپورٹ پر دھند کے باعث پروازوں کی آمد و رفت متاثر رہی، اور خراب موسم و کم حدِ نگاہ کے سبب قطر ایئرویز کی پرواز اسلام آباد منتقل کر دی گئی۔