آسٹریا کے سرمایہ کار پاکستان میں سرمایہ کاری پر متفق، شہباز شریف کا دورہ کامیاب

اسلام آباد( کامرس ڈیسک)وزیراعظم شہباز شریف کے دورہ آسٹریا کے دوران سرمایہ کاروں نے پاکستان میں سرمایہ کاری کے لیے اتفاق کر لیا ہے۔وزیراعظم نے آسٹریا کے سرمایہ کاروں اور تاجروں کو پاکستان میں سرمایہ کاری کی دعوت دی، جس پر دونوں فریقین نے مثبت دلچسپی کا اظہار کیا۔نائب وزیراعظم اور وزیرخارجہ اسحاق ڈار نے ویانا میں پاک۔آسٹریا اعلیٰ سطح کے بزنس راؤنڈ ٹیبل سے خطاب کرتے ہوئے کہا کہ دونوں ممالک کے درمیان تجارت، سرمایہ کاری، ٹیکنالوجی اور جدت کے شعبوں میں تعاون بڑھانے کی ضرورت ہے۔ انہوں نے کہا کہ اقتصادی روابط میں توسیع سے باہمی خوش حالی کے نئے دروازے کھلیں گے۔اسحاق ڈار نے پاکستان میں جاری معاشی اصلاحات اور کاروبار میں آسانی کے لیے حکومتی اقدامات اجاگر کرتے ہوئے کہا کہ حکومت سرمایہ کار دوست ماحول فراہم کرنے کے لیے پرعزم ہے۔نائب وزیراعظم نے آسٹریا کی تکنیکی مہارت اور پاکستان کی متحرک منڈی و نوجوان افرادی قوت کے درمیان ہم آہنگی کو اجاگر کرتے ہوئے کہا کہ مشترکہ منصوبوں اور ٹیکنالوجی ٹرانسفر کے وسیع مواقع موجود ہیں۔انہوں نے پاکستان کے عزم کا اعادہ کیا کہ آسٹریا کے ساتھ مضبوط شراکت داری اور یورپی خطے میں اقتصادی تعلقات کے فروغ کے ذریعے ترقی، طویل المدتی معاشی شراکت داری اور کاروباری مواقع پیدا کیے جائیں گے۔