چینی ٹیکنالوجی کمپنی ہواوے نے ایک منفرد اور جدید تین فولڈ اسمارٹ فون انٹرنیشنل مارکیٹ میں لانچ کر دیا ہے، جس کی قیمت حیرت انگیز طور پر 3,499 یورو (تقریباً 10 لاکھ 23 ہزار پاکستانی روپے) مقرر کی گئی ہے۔ یہ ماڈل “میٹ ایکس ٹی” کے نام سے متعارف کرایا گیا ہے اور اسے دنیا کا سب سے مہنگا اسمارٹ فون قرار دیا جا رہا ہے۔
اس فون کی نمایاں خصوصیت اس کی 10.2 انچ کی وسیع مگر نہایت پتلی اسکرین ہے، جو 33.6 ملی میٹر کی موٹائی رکھتی ہے۔ اس ڈسپلے کو تین علیحدہ سیکشنز میں فولڈ کیا جا سکتا ہے، جو اسے موبائل فونز کے میدان میں بے مثال بنا دیتا ہے۔
ہواوے کی جانب سے یہ اعلان ملائیشیا کے دارالحکومت کوالالمپور میں منعقدہ ایک تقریب میں کیا گیا۔ ماہرین اسے امریکی کمپنیوں کے ساتھ مسابقت میں ہواوے کی ایک بڑی پیش رفت قرار دے رہے ہیں، خاص طور پر اس وقت جب ہواوے کو گوگل کے چپس تک رسائی نہیں مل رہی۔ انٹرنیشنل ڈیٹا کارپوریشن کے نائب صدر برائن ما کے مطابق ہواوے اپنی جدت کے باعث انفرادیت کے ساتھ نمایاں ہے، اور یہ فون کمپنی کے لیے ایک مثبت کامیابی کے طور پر دیکھا جا رہا ہے۔
میٹ ایکس ٹی کو سب سے پہلے پانچ ماہ پہلے چین میں لانچ کیا گیا، جہاں یہ مارکیٹ میں خاصا مقبول ہوا۔ اب بین الاقوامی سطح پر متعارف کروانے سے، اس فون سے بھرپور رسپانس کی توقع کی جا رہی ہے۔
ہواوے کی یہ کوشش نہ صرف ٹیکنالوجی کی دنیا میں جدت کو فروغ دینے کے لیے ہے بلکہ اسے امریکی کمپنیوں کے مقابلے میں اپنی برتری دکھانے کا بھی ایک اہم قدم سمجھا جا رہا ہے۔
