جوبین نوٹیال کی خفیہ شادی کی خبر، مداح حیران رہ گئے

ممبئی( شوبز ڈیسک)بھارتی معروف پلے بیک گلوکار جوبین نوٹیال کے بارے میں اطلاعات سامنے آئی ہیں کہ انہوں نے اپنی دیرینہ محبوبہ سے خاموشی کے ساتھ شادی کر لی ہے، تاہم اس حوالے سے تاحال کوئی باضابطہ تصدیق سامنے نہیں آئی۔بھارتی ذرائع ابلاغ کے مطابق چھتیس سالہ گلوکار نے اپنے آبائی شہر اتراکھنڈ میں نہایت سادہ اور نجی تقریب میں نکاح کیا، جس میں صرف قریبی رشتہ داروں نے شرکت کی۔رپورٹس کے مطابق تقریب کو جان بوجھ کر محدود رکھا گیا تاکہ غیر ضروری توجہ سے بچا جا سکے، جبکہ جوبین نوٹیال نے شاندار تقریب کے بجائے روایتی اور سادہ انداز کو ترجیح دی۔ذرائع کا کہنا ہے کہ گلوکار ہمیشہ اپنی نجی زندگی کو منظرعام پر لانے سے گریز کرتے ہیں، اسی لیے انہوں نے اس اہم موقع کو بھی صرف اپنے قریبی افراد کے ساتھ منایا۔دوسری جانب دلہن کی شناخت اب تک ظاہر نہیں کی گئی، جبکہ گلوکار کی جانب سے بھی اس حوالے سے کوئی تصویر یا باضابطہ بیان جاری نہیں کیا گیا ہے۔واضح رہے کہ جوبین نوٹیال کا شمار بھارتی فلمی صنعت کے نمایاں گلوکاروں میں ہوتا ہے اور وہ متعدد معروف اعزازات اپنے نام کر چکے ہیں۔