دورہ بنگلہ دیش کی تیاریاں تیز، قومی ٹیم کا تربیتی کیمپ کراچی میں لگانے کا فیصلہ

لاہور( سپور ٹس ڈیسک)قومی کرکٹ ٹیم کے دورہ بنگلہ دیش کی تیاریوں کے سلسلے میں ٹیسٹ سکواڈ کا تربیتی کیمپ کراچی میں لگانے کا فیصلہ کر لیا گیا ہے۔ذرائع کے مطابق کھلاڑی 29 اپریل سے کیمپ میں رپورٹ کریں گے جبکہ قومی ٹیم 3 مئی کی رات بنگلہ دیش کے لیے روانہ ہوگی۔ذرائع کا کہنا ہے کہ ٹیسٹ سکواڈ کے حتمی انتخاب کے لیے قومی سلیکٹرز کے درمیان مشاورت جاری ہے جس میں سابق کپتان سرفراز احمد بھی شامل ہیں، وہ آئندہ سیریز میں ہیڈ کوچ کی ذمہ داریاں سنبھالیں گے۔اطلاعات کے مطابق ٹیم اور انتظامیہ میں بعض تبدیلیوں کا امکان ہے، جبکہ وکٹ کیپر روحیل نذیر کو بھی سیریز میں موقع دیے جانے پر غور کیا جا رہا ہے۔پاکستان اور بنگلہ دیش کے درمیان دو ٹیسٹ میچز پر مشتمل سیریز عالمی ٹیسٹ چیمپئن شپ کا حصہ ہوگی، پہلا میچ 8 مئی سے سلہٹ جبکہ دوسرا 16 مئی سے ڈھاکا میں کھیلا جائے گا۔واضح رہے کہ قومی ٹیم نے آخری ٹیسٹ سیریز گزشتہ سال اکتوبر میں جنوبی افریقہ کے خلاف کھیلی تھی۔