بھارتی پنجاب کے مشہور گلوکار و اداکار دلجیت دوسانجھ نے کنسرٹس کے ٹکٹس کی بلیک مارکیٹ میں فروخت کے حوالے سے اپنی صفائی پیش کی ہے۔ بھارتی میڈیا کی رپورٹ کے مطابق، دلجیت نے ان افراد پر تنقید کی ہے جنہوں نے اس معاملے میں ان پر الزام عائد کیا۔
دلجیت دوسانجھ نے اپنی انسٹاگرام ویڈیو میں کہا، “یہ کہا جا رہا ہے کہ میرے کنسرٹ کی ٹکٹس بلیک میں فروخت ہو رہی ہیں، لیکن اگر کوئی دس روپے کی ٹکٹ خرید کر اسے سو روپے میں بیچ دے تو اس میں فنکار کا کیا قصور؟” انہوں نے مزید کہا کہ اس الزام میں کوئی حقیقت نہیں ہے اور وہ ان بے بنیاد الزامات کے باوجود بے خوف ہیں۔ انہوں نے کہا، “اگر مجھ پر الزامات لگائے جا رہے ہیں تو مجھے اس کی کوئی فکر نہیں ہے، میں بدنام ہونے کا خوف نہیں رکھتا۔”
اندور میں اپنے کنسرٹ کے دوران، دلجیت نے اپنے مداحوں سے بات کرتے ہوئے کہا کہ وہ اپنے کام پر توجہ مرکوز رکھتے ہیں اور اس طرح کی مشکلات کے باوجود وہ اپنی موسیقی کی دنیا میں کامیابی حاصل کرتے رہیں گے۔
دلجیت نے اس موقع پر اپنے ساتھی فنکاروں کرن اوجلا اور اے پی ڈھلن کے ساتھ مل کر ایک ٹور شروع کرنے کا اعلان بھی کیا۔ ان کا کہنا تھا کہ انڈیپینڈنٹ میوزک کا دور شروع ہو چکا ہے اور اس میں مشکلات آئیں گی، مگر وہ اپنا کام جاری رکھیں گے۔ انہوں نے بھارتی فنکاروں کی کامیابی پر خوشی کا اظہار کرتے ہوئے کہا، “اب بھارتی فنکاروں کے کنسرٹس کی ٹکٹس بلیک میں فروخت ہو رہی ہیں، جسے ‘ووکَل فار لوکل’ کہتے ہیں۔ یہ ہمارے لیے ایک بڑی کامیابی ہے۔”
دلجیت نے آخر میں انڈیپینڈنٹ گلوکاروں کے لیے اپنے خیالات کا اظہار کرتے ہوئے کہا کہ بھارتی میوزک کا یہ سنہری دور ہے اور انڈیپینڈنٹ گلوکاروں کو دوگنی محنت کرنی ہوگی تاکہ وہ اس میں کامیاب ہو سکیں۔
دلجیت دوسانجھ، جو دنیا بھر میں کنسرٹس کر رہے ہیں، حال ہی میں پاکستانی اداکارہ ہانیہ عامر کے ساتھ اپنے کنسرٹ میں شریک ہونے پر خبروں میں آئے تھے، جس کی ویڈیوز سوشل میڈیا پر وائرل ہو گئیں تھیں۔
