ڈنمارک ایمبیسی سے پاسپورٹ نہ ملنے کے باعث پاکستانی باکسر محمد وسیم کی مالٹا میں ہونے والی ڈبلیو بی ایف بینٹم ویٹ ٹائٹل فائٹ متاثر ہونے کا خدشہ ہے۔
محمد وسیم کی ٹائٹل فائٹ 4 اکتوبر کو مالٹا میں شیڈول ہے، لیکن ابھی تک انہیں ڈنمارک ایمبیسی سے پاسپورٹ واپس نہیں ملا۔ سوشل میڈیا پر اپنے پیغام میں، محمد وسیم نے وزیراعلیٰ پنجاب مریم نواز اور وزیراعظم پاکستان سے اپیل کی ہے کہ انہیں ان کا پاسپورٹ واپس دلوایا جائے، ورنہ ان کی فائٹ کی تیاری متاثر ہو سکتی ہے۔
محمد وسیم نے بتایا کہ انہوں نے ڈنمارک ویزے کے لیے 22 جولائی کو پاسپورٹ جمع کرایا تھا، لیکن اس کے نہ ملنے کی وجہ سے وہ تربیتی کیمپ میں شامل نہیں ہو پا رہے ہیں۔ انہوں نے مزید کہا کہ 4 اکتوبر کو عالمی ٹائٹل فائٹ ہے، اور پاسپورٹ نہ ہونے کی وجہ سے ان کی تیاری متاثر ہو رہی ہے، لہذا جلد از جلد پاسپورٹ واپس کیا جائے تاکہ وہ اپنی فائٹ کی تیاری مکمل کر سکیں۔
