شیخ حسینہ واجد کے استعفے اور پارلیمنٹ کی تحلیل کے بعد نوبل انعام یافتہ ڈاکٹر محمد یونس کو بنگلادیش کی عبوری حکومت کا سربراہ مقرر کر دیا گیا ہے۔
بنگلادیشی میڈیا کے مطابق، ڈاکٹر محمد یونس کی سربراہی میں عبوری حکومت کے ارکان کو آج حتمی شکل دیے جانے کا امکان ہے، جبکہ پروفیسر یونس کل پیرس سے ڈھاکا پہنچیں گے۔
بنگلادیشی میڈیا کا کہنا ہے کہ عبوری حکومت کے چارج سنبھالتے ہی انتخابات کا اعلان اور اس کے لیے اقدامات متوقع ہیں۔
بھارتی میڈیا سے گفتگو کرتے ہوئے، پروفیسر محمد یونس نے کہا کہ بھارت کے بنگلادیش کے غلط لوگوں کے ساتھ اچھے تعلقات ہیں، براہ کرم بھارت اپنی خارجہ پالیسی پر نظرثانی کرے۔
یاد رہے کہ عبوری حکومت کی سربراہی کے لیے پروفیسر محمد یونس کا نام طلبہ تحریک کے رہنماؤں کی جانب سے تجویز کیا گیا تھا۔
دوسری جانب، بنگلادیشی میڈیا کے مطابق ڈھاکا میں سینٹرل بینک کے اہلکاروں کے احتجاج کے بعد 4 ڈپٹی گورنرز مستعفی ہو گئے ہیں جبکہ بدعنوانی کے الزام پر بینک کے گورنر سے بھی استعفے کا مطالبہ کیا گیا ہے۔
شیخ حسینہ واجد کے ملک سے فرار ہونے اور مظاہروں کے ختم ہونے کے بعد اب بنگلادیش میں زندگی معمول پر آ رہی ہے۔ تعلیمی ادارے اور گارمنٹس فیکٹریاں دوبارہ کھل گئی ہیں اور سڑکوں پر ٹریفک رواں دواں ہے۔
اپوزیشن جماعت کی رہنما خالدہ ضیا کی رہائی کے بعد، ڈھاکا میں بنگلادیش نیشنلسٹ پارٹی آج ایک ریلی نکال رہی ہے جس میں عوام کی بڑی تعداد شریک ہے۔ جبکہ سابق وزیراعظم شیخ حسینہ کے اگلے چند دنوں تک بھارت سے باہر جانے کا امکان نہیں ہے۔
