حزب اللہ کے سربراہ حسن نصراللہ نے کہا ہے کہ اسرائیل پر جلد حملہ ہونے والا ہے اور حملے کے وقت سے متعلق بے یقینی اسرائیل کی سزا کا حصہ ہے۔
عرب میڈیا کے مطابق حسن نصراللہ نے اپنے بیان میں کہا کہ اسرائیل جنگی طیاروں سے لبنانی فضائی حدود میں ساؤنڈ بیرئیر توڑ کر خوف پھیلانا چاہتا ہے۔ انہوں نے واضح کیا کہ نیتن یاہو غزہ پٹی میں جنگ بندی نہیں چاہتے۔
انہوں نے کہا کہ ہم شاید اسرائیل کو اکیلے جواب دیں یا مزاحمتی گروپ کے ساتھ مل کر جواب دیں گے۔ اسرائیل پر ہمارا ردعمل ضرور آئے گا اور بھرپور ہوگا۔
حسن نصراللہ کا کہنا تھا کہ ہم شمال میں اسرائیل کی کیمیکل اور فوڈ فیکٹریاں آدھے گھنٹے سے بھی کم وقت میں تباہ کرسکتے ہیں۔ اسرائیلی حملے میں کمانڈر فواد شکر کی شہادت سے حزب اللہ کو بڑا نقصان پہنچا ہے اور اسماعیل ہنیہ کی شہادت سے حماس سمیت حزب اللہ کو بھی دھچکا لگا ہے۔
حسن نصراللہ کے بیان کے بعد اسرائیلی قصبوں میں خطرے کے سائرن بجنے لگے۔
