ڈھاکا: بنگلادیش کے نوبیل انعام یافتہ ڈاکٹر محمد یونس نے حسینہ واجد کے اقتدار کے خاتمے کے بعد ملک کو آزاد قرار دے دیا۔
بنگلادیشی میڈیا کے مطابق، ایک انٹرویو میں ڈاکٹر یونس نے کہا کہ ملک میں جاری تشدد کے بعد شیخ حسینہ واجد کے خاتمے سے بنگلادیش اب ایک آزاد ملک ہے۔
انہوں نے کہا کہ حسینہ واجد کے دور اقتدار میں ہم ایک مقبوضہ ملک میں رہ رہے تھے کیونکہ وہ ایک قابض طاقت، آمر اور فوجی جنرل کی طرح رویہ رکھتی تھیں اور ہر چیز پر کنٹرول چاہتی تھیں۔ لیکن آج، بنگلادیش کا ہر شہری خود کو آزاد محسوس کر رہا ہے۔
ڈاکٹر یونس کا کہنا تھا کہ ملک میں مظاہرین کا تشدد اور احتجاج شیخ حسینہ کے خلاف غصے کا اظہار تھا۔
انہوں نے امید ظاہر کی کہ شیخ حسینہ کی حکومت کا تختہ الٹنے والے نوجوان اب ملک کو صحیح سمت میں لے جائیں گے اور اس کی قیادت کریں گے۔
میڈیا رپورٹس کے مطابق، شیخ حسینہ واجد کی حکومت نے ڈاکٹر یونس پر 190 مقدمات درج کیے تھے اور وہ اس وقت ضمانت پر ہیں۔
واضح رہے کہ شیخ حسینہ کی حکومت کے خاتمے کے بعد بنگلادیشی طلبہ تحریک نے ملک میں فوجی حکومت قبول کرنے سے انکار کر دیا ہے اور ڈاکٹر یونس کی سربراہی میں عبوری حکومت کے قیام کا مطالبہ کیا ہے۔
