پاکستان کے مایہ ناز گلوکار اور قومی نغموں کے ذریعے اپنی حب الوطنی کا اظہار کرنے والے ابرار الحق نے حالیہ دنوں ایک نیا ملی نغمہ ریلیز کیا ہے، جسے انہوں نے افواج پاکستان کے نام منسوب کیا ہے۔ اس نغمے کا مقصد نہ صرف ملکی افواج کو خراج تحسین پیش کرنا ہے بلکہ بھارتی پروپیگنڈے اور حالیہ الزام تراشیوں کا منہ توڑ جواب دینا بھی ہے۔
نغمے کی شروعات ایک زوردار جملے سے ہوتی ہے: “شیروں کی ایک ہی دھاڑ میں، سندور گیا تیرا بھاڑ میں” – جسے عوام کی جانب سے دشمن ملک کے خلاف بر وقت اور موثر جواب قرار دیا جا رہا ہے۔ نغمے میں افواج پاکستان کی جرات، بہادری اور قوم کے حوصلے کو نمایاں انداز میں پیش کیا گیا ہے۔
یہ نغمہ ایسے وقت میں سامنے آیا ہے جب بھارت کی جانب سے 22 اپریل سے 9 مئی تک پاکستان پر پہلگام واقعے کے حوالے سے جھوٹے الزامات عائد کیے گئے۔ تاہم پاکستانی فوج نے پیشہ ورانہ صلاحیتوں کے ذریعے ان الزامات کو ناکام بنایا اور بھارتی عزائم کو خاک میں ملا دیا۔ یہی کامیابی اب قوم کے ہر فرد کے دل میں فخر اور جذبے کی صورت میں نظر آ رہی ہے۔
سوشل میڈیا پر اس نغمے کو زبردست پذیرائی حاصل ہو رہی ہے۔ ٹوئٹر، فیس بک اور یوٹیوب سمیت تمام پلیٹ فارمز پر صارفین ابرار الحق کی آواز اور الفاظ کو سراہ رہے ہیں۔ صارفین اسے نہ صرف ایک حب الوطنی سے بھرپور نغمہ قرار دے رہے ہیں بلکہ افواج پاکستان کی قربانیوں کا جاندار اعتراف بھی۔
ابرار الحق کا یہ نیا ترانہ اس بات کی یاد دہانی ہے کہ پاکستانی قوم اور اس کی مسلح افواج ہر مشکل وقت میں متحد ہوتی ہیں، اور ہر چیلنج کا جواب عزم، ہمت اور جوش سے دیا جاتا ہے۔
