اسلام آباد: معروف امریکی دفاعی جریدے “دی نیشنل انٹرسٹ” نے اپنی تازہ ترین رپورٹ میں انکشاف کیا ہے کہ 7 مئی کو پیش آنے والی پاک بھارت فضائی جھڑپ میں پاکستانی فضائیہ نے واضح فتح حاصل کی۔ رپورٹ کے مطابق، پاکستان نے چین کی جدید ترین دفاعی ٹیکنالوجی کا استعمال کرتے ہوئے بھارتی فضائیہ کو ناقابل تردید شکست سے دوچار کیا۔
رپورٹ میں بتایا گیا ہے کہ اگرچہ بھارت کے پاس عددی برتری اور وسائل کی کثرت تھی، لیکن پاکستانی پائلٹوں نے اپنی جنگی مہارت اور جدید ہتھیاروں کے ذریعے دشمن کو پیچھے ہٹنے پر مجبور کر دیا۔ خاص طور پر چینی ساختہ J-10C لڑاکا طیاروں اور PL-15 میزائلوں نے فیصلہ کن کردار ادا کیا، جنہوں نے بھارتی فضائیہ کے 5 جنگی طیاروں کو تباہ کر دیا۔ قابل ذکر بات یہ ہے کہ مار گرائے گئے طیاروں میں سے 3 فرانسیسی ساختہ رافیل طیارے تھے، جنہیں بھارت اپنی فضائیہ کا سب سے طاقتور ہتھیار سمجھتا ہے۔
امریکی جریدے نے اس بات پر حیرت کا اظہار کیا ہے کہ بھارتی حکومت یا فوج نے پاکستان کی جانب سے کیے گئے کامیابی کے دعوؤں کی کوئی سرکاری تردید نہیں کی، جو بھارت کی دفاعی کمزوریوں کو ظاہر کرتا ہے۔ رپورٹ میں یہ بھی واضح کیا گیا ہے کہ اس جھڑپ نے مغربی ممالک کو چینی دفاعی ٹیکنالوجی کی برتری کا واضح پیغام دیا ہے۔
دفاعی ماہرین کا کہنا ہے کہ یہ واقعہ نہ صرف پاک فضائیہ کی صلاحیتوں کا منہ بولتا ثبوت ہے، بلکہ یہ چین کے دفاعی شعبے میں تیزی سے ہونے والی ترقی کا بھی اعلان ہے۔ رپورٹ کے مطابق، PL-15 میزائل کی کارکردگی نے ثابت کیا کہ چین اب جدید ترین ہتھیاروں کی تیاری میں دنیا کے سرفہرست ممالک میں شامل ہو چکا ہے۔
اس واقعے کے بعد دفاعی حلقوں میں یہ بحث چل نکلی ہے کہ بھارت کو اپنی فضائی حکمت عملی پر نظرثانی کرنے کی ضرورت ہے۔ دوسری جانب، پاکستان کی یہ کامیابی اس بات کا ثبوت ہے کہ چھوٹی لیکن تربیت یافتہ اور جدید ٹیکنالوجی سے لیس فوج بڑی طاقتوں کو بھی چیلنج کر سکتی ہے۔
