اسلام آباد: نوبل انعام یافتہ سماجی کارکن ملالہ یوسف زئی نے غزہ میں جاری انسانی بحران پر گہری تشویش کا اظہار کرتے ہوئے عالمی برادری سے فوری انسانی امداد کی فراہمی اور مستقل جنگ بندی کا مطالبہ کیا ہے۔ انہوں نے سوشل میڈیا پر نیویارک ٹائمز کی ایک رپورٹ شیئر کرتے ہوئے غزہ کے بچوں کی المناک صورتحال کو اجاگر کیا۔
ملالہ نے اپنے بیان میں کہا، “غزہ کے معصوم بچے جو شدید بھوک اور طبی سہولیات کی کمی کا شکار ہیں، یہ صورتحال دل دہلا دینے والی ہے۔ میں ان بچوں کی حفاظت اور بہتر مستقبل کے لیے دعاگو ہوں۔” انہوں نے زور دے کر کہا کہ دنیا کو فوری طور پر غزہ میں امداد پہنچانے اور جنگ کا خاتمہ کرنے کی ضرورت ہے۔
رپورٹس کے مطابق، اسرائیلی ناکہ بندی کے باعث غزہ میں تین لاکھ کے قریب بچے فاقہ کشی کا شکار ہیں، جبکہ ساڑھے تین ہزار شیر خوار بچے شدید غذائی قلت کا سامنا کر رہے ہیں۔ اسرائیل نے 2 مارچ سے ہر قسم کی انسانی امداد کے داخلے پر پابندی عائد کر رکھی ہے، جس نے بحران کو اور گہرا کر دیا ہے۔
بین الاقوامی امدادی تنظیم اوکسفیم نے اس صورتحال پر عالمی خاموشی کو “مجرمانہ” قرار دیتے ہوئے فوری انسانی مداخلت کی اپیل کی ہے۔ تنظیم کے مطابق غزہ کے اسپتالوں میں دوائیوں اور طبی آلات کی شدید قلت ہے، جبکہ 80 فیصد آبادی کو صاف پانی تک رسائی حاصل نہیں۔
ملالہ یوسف زئی کا یہ بیان ایسے وقت میں سامنے آیا ہے جب اقوام متحدہ کی رپورٹس کے مطابق غزہ میں انسانی بحران روز بروز سنگین ہوتا جا رہا ہے۔ عالمی ادارہ صحت کے مطابق غذائی قلت کے شکار بچوں کی تعداد میں روزانہ اضافہ ہو رہا ہے، جبکہ متعدد اسپتالوں نے نوزائیدہ بچوں کے لیے انکیوبیٹرز کی کمی کی اطلاع دی ہے۔
تعلیم کی عالمی سفیر ملالہ نے اپنے بیان میں زور دیا کہ “بچوں کا تحفظ اور ان کا حقِ زندگی ہر چیز سے بالاتر ہے۔ ہمیں ان معصوموں کی آواز بننا چاہیے جو اس ظلم کا شکار ہو رہے ہیں۔” انہوں نے عالمی رہنماؤں سے اپیل کی کہ وہ اس انسانی بحران کو ختم کرنے کے لیے فوری اور موثر اقدامات کریں۔
