اسلام آباد: وزیراعظم شہباز شریف نے کہا ہے کہ ملک سے پولیو کے مکمل خاتمے کے لیے وفاق اور صوبوں کے درمیان مؤثر تعاون ناگزیر ہے۔
وزیراعظم کی زیر صدارت انسداد پولیو مہم سے متعلق ایک اہم اجلاس منعقد ہوا، جس میں ملک بھر میں جاری پولیو مہم کی پیشرفت کا جائزہ لیا گیا۔ اجلاس میں وزیراعظم کو بتایا گیا کہ تمام صوبوں میں انسداد پولیو مہم بھرپور انداز میں جاری ہے۔
وزیراعظم نے پولیو کیسز کی بروقت شناخت اور ان میں نمایاں کمی پر صوبائی انتظامیہ کی کارکردگی کو سراہا۔ انہوں نے کہا کہ فروری 2025 میں پولیو کیسز میں کمی انسداد پولیو مہم کی کامیابی کی علامت ہے۔ ان کا کہنا تھا کہ پولیو کے مکمل خاتمے کے لیے ہم پرعزم ہیں اور یہ ہدف وفاقی اور صوبائی حکومتوں کے مشترکہ اقدامات سے ہی حاصل کیا جا سکتا ہے۔
وزیراعظم نے پولیو سے متعلق ڈیٹا کو ڈیجیٹلائز کرنے اور مہم کی سخت نگرانی کی ہدایت بھی کی۔ اس دوران انہوں نے پولیو مہم میں سیکیورٹی فورسز کے تعاون کو سراہتے ہوئے کہا کہ ان کی مدد کے بغیر یہ مہم کامیاب نہیں ہو سکتی۔
اجلاس میں دی گئی بریفنگ کے مطابق فروری 2025 کی پولیو مہم میں 42.5 ملین بچوں کو پولیو کے قطرے پلائے گئے، جبکہ پولیو سے متاثرہ اضلاع میں تقریباً 90 فیصد بچوں کو ویکسین دی گئی۔ رپورٹ کے مطابق، 2025 کے آغاز سے اب تک ملک میں 6 پولیو کیسز رپورٹ ہوئے ہیں۔
فروری میں شروع ہونے والی انسداد پولیو مہم کے بعد بلوچستان، سندھ اور جنوبی خیبرپختونخوا میں پولیو کیسز میں نمایاں کمی دیکھی گئی ہے۔ مزید دو پولیو مہمات اپریل اور مئی میں منعقد کی جائیں گی تاکہ بیماری کے پھیلاؤ کو مکمل طور پر روکا جا سکے۔
پولیو مہم کی مستقل نگرانی کے لیے آئی ٹی ڈیش بورڈ کا استعمال کیا جا رہا ہے، جس سے مہم کے تمام پہلوؤں کی نگرانی کی جا رہی ہے۔ اجلاس میں وزیر مملکت ڈاکٹر مختار بھرت، سینیٹر عائشہ رضا فاروق اور متعلقہ اداروں کے اعلیٰ افسران نے شرکت کی۔
