ایک نئی تحقیق میں انکشاف کیا گیا ہے کہ ایئرپورٹس کے قریب رہنے والوں کو دل کا دورہ یا فالج پڑنے کے امکانات زیادہ ہوتے ہیں۔ یہ تحقیق یونیورسٹی کالج لندن کے محققین کی قیادت میں کی گئی، جس میں ہوائی جہازوں کے شور کے اثرات کا جائزہ لیا گیا۔
تحقیق کے مطابق ایئرپورٹس کے قریب رہنے والے افراد میں دل کی بیماریوں اور فالج کا خطرہ اس وجہ سے بڑھ سکتا ہے کہ وہ ہوائی جہازوں کے شور میں زیادہ وقت گزارتے ہیں۔ اس تحقیق میں انگلینڈ کے چار بڑے ایئرپورٹس کے قریب رہنے والے 3,635 افراد کے دل کی امیجنگ ڈیٹا کا تجزیہ کیا گیا، اور اس کا موازنہ ان علاقوں کے افراد سے کیا گیا جہاں ہوائی جہازوں کا شور کم تھا۔
تجزیے کے نتائج میں یہ بات سامنے آئی کہ رات کے وقت شور کی سطح میں اضافہ اور نیند میں خلل کی وجہ سے ایئرپورٹس کے قریب رہنے والوں میں دل کی بیماریوں اور فالج کا خطرہ بڑھ جاتا ہے۔ ایئرپورٹس کے قریب رہنے والے افراد، جو زیادہ وقت شور میں گزارتے ہیں، ان میں دل کے مسائل اور فالج کے امکانات زیادہ ہوتے ہیں۔
ماہرِ امراضِ قلب، گیبی کیپٹر نے اس تحقیق کے نتائج پر تبصرہ کرتے ہوئے کہا کہ یہ تجزیہ مشاہدے کی بنیاد پر کیا گیا ہے، لہٰذا ہم یہ نہیں کہہ سکتے کہ شور کی بلند سطح کا دل کی ساخت یا افعال پر براہ راست اثر پڑتا ہے، لیکن ہمارے نتائج اس بات کی نشاندہی کرتے ہیں کہ ہوائی جہاز کا شور مجموعی طور پر انسان کی صحت پر منفی اثر ڈال سکتا ہے۔
یہ تحقیق ہوائی جہازوں کے شور کے ممکنہ خطرات کو اجاگر کرتی ہے اور صحت پر اس کے اثرات پر مزید تحقیقات کی ضرورت پر زور دیتی ہے۔
