چترال کی کیلاش وادی میں کیلاش قبیلے کا مذہبی تہوار چترموس (چاؤموس) اپنی پوری رنگینی کے ساتھ جاری ہے، جس میں دنیا بھر سے سیاحوں کی آمد کا سلسلہ تیزی سے جاری ہے۔ یہ تہوار کیلاش کے تینوں معروف علاقے، رمبور، بریر اور بمبوریت میں منایا جا رہا ہے، اور اس کی انفرادیت اور ثقافتی اہمیت نے اس کو عالمی سطح پر توجہ کا مرکز بنا دیا ہے۔
چاؤموس تہوار موسم سرما میں خوشی، امن اور اتحاد کی علامت کے طور پر منایا جاتا ہے، جس میں مقامی لوگ اپنے روایتی لباس میں ملبوس ہو کر مختلف رسوم ادا کرتے ہیں۔ اس تہوار میں بون فائر کی خاص اہمیت ہے، جو سردیوں کی شدت کو کم کرنے کے لئے کیا جاتا ہے۔ بچوں اور بچیوں نے اپنے ہاتھوں میں چھوٹی چھوٹی پتیاں اٹھا کر گانے گائے اور مختلف ثقافتی رسومات ادا کیں۔ اس موقع پر سیاحوں کے ساتھ امن، محبت اور اتحاد کے پیغامات کے طور پر پھل، سبزیاں اور خشک میوہ جات بھی تقسیم کیے گئے۔
فیسٹیول میں شیشائو، منڈاہیک اور شارا بیرایک جیسے منفرد رسومات بھی ادا کیے گئے۔ شارا بیرایک کی رسم میں، گندم سے بنے ہوئے مختلف جانوروں جیسے بکری، مارخور اور دنبے کے مجسمے تیار کیے گئے، جو اس تہوار کی ایک اہم روایت ہے۔
سیاحوں کی سہولت کے لیے حکومت کی جانب سے اقدامات کیے گئے ہیں، اور ٹورازم پولیس کے جوان اس دوران سیاحوں کو مکمل رہنمائی اور سہولت فراہم کر رہے ہیں۔ ڈی جی ٹورازم، تاشفین حیدر نے اس بات کی تصدیق کی ہے کہ ٹورازم پولیس لواری ٹنل اور کیلاش جانے والے راستوں پر ڈیوٹی سرانجام دے رہی ہے، اور سیاح ٹورازم ہیلپ لائن 1422 سے ضروری معلومات حاصل کرسکتے ہیں۔
یہ تہوار نہ صرف مقامی ثقافت کو اجاگر کرتا ہے بلکہ چترال کی سیاحت کو بھی عالمی سطح پر فروغ دے رہا ہے۔
